眾新聞 Logo
眾新聞 CitizenNews
眾說

膝頭哥唔食辣椒醬──答讀者幾個摩天輪基本問題


 

照片來源:hotels.com

對上兩篇:
香港中環隨時乜輪都冇,得塊爛地獻世?
魔鬼交易摩天輪

SWISS AEX究竟做得好不好?賺定蝕?

技術上肯定好,起碼冇出過意外。

風評唔會唔好,在香港最貴嘅地皮上裝個二十樓層高的地標,論地價已經贏晒。你唔放個輪改放隻二十層樓高的充氣梁振英,都會變成旅遊景點,獲國際網媒推薦到此一遊。這是全世界最容易做的國際公關,冇乜咁巴閉。呢個project最珍貴是在那個地皮做地標,而不是呢個地標係乜輪嘢。

至於賺定蝕?

有個網媒一直吹噓佢「過去三年有五百萬人次」,獲旅客熱烈歡迎。

咁我地回頭先睇經營結構和票價:

.此項目投資約二億港元;
.經營時間由2014.12.05 到2017.8.28,約二年九個月,或2.75年,或33個月,或143星期;
.預計摩天輪首年乘客最高可達100萬人次;
.香港摩天輪設置42個車廂,每廂可載8人,全程15至20分鐘,轉速會因天氣狀況作出調整,約轉2至3個圈;
.三號強風信號或以上、黑色暴雨警告信號生效期間,摩天輪將會暫停開放
.成人收費為港幣100元,學生、小童港幣70元,長者及傷殘人士為港幣50元。另設有包廂價錢,2-3人為港幣500元,4-8人為港幣800元;
.開放時間為星期一至日及公眾假期:10am 至 11pm

所以話依家D人個個識用手機就唔記得咗用計數機。
所謂500萬人次,一人一百蚊就五億,打個七折都三億五,賺到笑啦,第二次輸左標,掩住半邊咀笑住走,乜都留返俾你又有乜所謂呢。

所謂500萬人次,你用5,000,000/(143週 x 7日),自營運以來每天風雨無阻平均有4995人在玩摩天輪,黃大仙都冇咁神心啦,你恰我撐久硬個硬淨膝頭哥唔食辣椒醬!咪玩啦!

呢單嘢想打個平手,大概要250萬人次 x 100元再打八折(打八折是用來平衡特價票、團體票和公關票的低收入),咁就湊夠二億。咁250萬人次,即係過去兩年又九個月每天風雨無阻平均有4995/2 = 接近2500人在排隊玩摩天輪,你信嘅,佢咪賺囉!

摩天輪營業到晚上11點,讓中環海濱有另一番景緻。照片來源:Dutch Wheels網站

第二個問題:新標商技術和價錢較優勝?

阿松講你就信?

香港是有限公司標不是私人標,我開間一元公司話俾政府知我的團隊有鋼鐵人、蟻人、綠巨人和蜘蛛人,全世界邊個技術好得過我?結果開工之時佢地唔係為咗拯救地球就係要解決私人感情,全部辭工,你吹得我脹咩?標書是跟有限公司簽約唔係跟員工或股東簽約,考量技術是該公司過往的營運紀錄是否包含該技術專業和持續服務過程中有冇賴過嘢,一間新開半年的一元公司白過張紙,有乜嘢技術可言?

第三個問題:政府標書可否使用新公司?

特殊狀況當然可以。不過通常有財務擔保。或萬一出事,間公司係nobody,政府等於自己要孭晒。不過一般政府招標,有咩鑊,依合約應該係贏標嗰位孭晒。

第四個問題:新公司但負責人經驗豐富符合專業要求得唔得?

梗係得! 如果你係李柱銘大律師事務所或貝聿銘建築師事務所,冇呢個負責人就冇呢個營運資格,有呢個人才有呢個資格,咁可以叫做負責人。不過香港是有限公司制不是有限公司負責人制,分別在於有限公司負責人制,公司登記有「負責人」,公司借貸或倒閉債權人可以告負責人索償。香港標書內的「負責人」只是個大家都願意去相信的指稱,沒有法律約束力。我話我公司的負責人係鋼鐵人,你信咪得啦, 有一日你要搵鋼鐵人去負責,我話佢同我分手好耐喎,毋須呈報,你吹得我脹?除非你叫負責人加簽個人擔保或公司簽張本票擔保啦。

這位是取得摩天輪新租約標的1人公司唯一股東Michael Denmark。他也是辦了多年AIA歐陸嘉年華活動的娛樂製作公司MDME的股東,佔46%股權。照片來源:mixmeetings.com

第五個問題:新營運商賣廿蚊張票點賺?

有兩個辦法: 
一,佢唔使投資二億買個新的摩天輪,咁就淨賺;
二,佢花二億買個新的摩天輪,然後每日過萬人排隊俾錢,咁都賺嫁,辛苦D,賣埋廣告或其他飲食/紀念品之類,有賭未為輸。

最後問題:香港是否需要有個摩天輪?

全世界第一個摩天輪建於一八九幾年,之後百幾年通常每個都市為咗展示繁華盛世歌舞昇平都會有個摩天輪嘅(成日打風、地震或打仗的地方,邊適合摩天輪?) 台灣就有三個摩天輪,都是建造在遊樂場。香港海洋公園也有個摩天輪。以前荔園都有。我地香港有陳奕迅幸福摩天輪唱到街知巷聞,有個摩天輪係好應該嘅,睇下擺邊度遮。

海洋公園的「摩天巨輪」。照片來源:海洋公園網站

通常摩天輪六面透明,登高以望遠,所以附近應該一望無際,先至夠偉大。中環海濱摩天輪,前面叫做對面海,後面是石屎森林,地皮全港最貴,選這個點搞摩天輪,表示政府大把錢,不過摩天輪坐上去有乜睇頭?除非放煙花嗰日吧。

尋日撐久硬帶住四個客遊中環,打電話俾經紀陳:我想睇個摩天輪附近十八樓以上向海單位,上到去講吓香港樓價又講下腳前的摩天輪,登高望遠,談笑風生,仲慳埋五舊水添,D客不知幾happy!

筆者按: 膝頭哥唔食辣椒醬,歇後語係「唔好呃我」