眾新聞 Logo
眾新聞 CitizenNews
眾說

過期春袋


 

我撐久硬遊走中港台廿九幾年,識得的老細冇一千都有八百。其中不少老細都是好學不倦勤勉有加,尤其係嗰D幼年失學連中學畢業證書都冇張嘅,日日鋤英文報睇Business Weekly、 Economist、Harvard Business Review,英語能力和經濟學識都係死砌返嚟,佢地對於嗰D世界級學術理論心存仰慕,於是對嗰D琅琅上口的學術派人士既自豪又自卑。自豪是因為老子唔讀書一樣發達有錢過你,自卑則可能係始終自己的經營模式有點見招拆招的即興,缺乏系統式的策略和管理。

咁當生意愈做愈大,一間中小型土法煉鋼企業如何轉身做變型金剛世界英雄,這種老細好自然會覺得當初跟佢一齊打江山嘅無非二流土佬,無法讓毛毛蟲蛻變成七彩斑斕嘅蝴蝶,昇華另一階段,於是四出招攬人才,目標當然鎖定那些外商三高的高層:學歷高職位高眼角高。

呢D國際大袋基本上英文是第一語言,開口就是Vision、Mission、Strategy,隨口噏就是過去全球的成功案例,好似真係單單都有佢份咁。老細聽到眉飛色舞,當正佢番生諸葛亮,立馬以國際頂級套餐請佢,飛行80分鐘也要商務艙,壹級富豪俱樂部高爾夫球會籍,百萬元最新款油電靚車連司機專人接送,各地housing十萬八萬一個月使用率不到10%也無問題。畢竟對於一個新王國的誕生,這些只是雞毛蒜皮的小錢,根本不算代價,只係睇到平日幫佢死慳死抵嗰班老夥計流晒口水遮。

大袋進入公司是一人之下萬人之上,公司得到史上最有潛力的大春袋 ,生命力源源不絕,所謂浴火重生,一家土雞仔公司搖身一變國際火鳳凰指日可待。於是整家公司開始學習春袋變身,一時P&G、IBM、Coca Cola;一時FB、Google、Amazon,人事布局千變萬化,公司結構重組再重組,三年五年下來,人才設備錢洗一大筆,公司又唔知點解賺少一大筆,短期收入減少支出增加,正是所謂轉型改革必經之路,黎明重生前的黑暗期必須經歷,但係.. .但係...再但係...就咁樣但係咗幾年,結果等極等唔到天光,原來因為全球經濟疲弱,時不我與,老闆,趁個招牌仲值幾個錢,不如賣咗佢,賺返晒過去幾年少賺都仲有凸喎,這叫敗部復活,最後反敗為勝!不枉你知遇之恩,我最後都沒讓你輸錢啦。

你老味,當初大好環境我請你嚟麻雀變鳳凰,靠你國際視野全球身手欲窮千里目更上一層樓,何解幾年後變成冚家鏟做唔落去要賣呢?

二十年前啲CEO遇上全球金融經濟起飛大氣候,美國企業幾乎做乜都成長,只要乸住個唔錯的牌子都會輕易成功。連倉儲物流和財務會計部門都可以變成profit center。嗰陣撐久硬在美商Fortune 50上班,基本上年年都幾次慶功,攻陷澳洲,中國設立新公司,新公司又分成華東華南好幾區,區區前途無量,股價狂升。D經理大哥大姐到底有幾本事可能連佢自己都唔知,所謂大風起時豬都被捲上天,上咗天以為自己真係會飛天。

十年前的CEO成長率追不上二十年前怎麼辦?打不贏的對手就把它併了,做不好的事業就把它賣了,只保留在市場上最獲利的頂尖事業 ,蛋黃區金雞母。知名併購從美國到全球到亞洲數之不盡,美國企業呢招玩到最後,近距離悽慘莫如2001年Yahoo併購奇摩站變成全台灣第一入口網站Yahoo奇摩,2006年Yahoo奇摩進一步拼購了全台灣最大社群網站無名小站,2013年無名小站關站,四年後Yahoo連自己都賣埋。好明顯併購呢招今時今日已經唔work。

Jack Welch是上世紀全球最優秀的CEO。Jack Welch Facebook

上世紀最優秀的CEO、全球最佳經理人Jack Welch,做了二十年GE CEO,大概就是做對了這些事。不過2008金融海嘯後全球經濟陷入已經九年的收縮期。今天的過時CEO腦袋還是停留在做全球經濟起飛時的那些事。所以公司表現一年比一年差,最後上賣招牌下賣員工。今時今日的CEO大袋仍妄想用呢幾招呃飯食,幫公司什麼浴火重生、轉型求生、起死回生,根本就係過期春袋的腦袋。

廿一世紀是分享年代,CEO當專注的是Development,服務發展和人才發展(當中都隱含了科技發展),而不再是marketing和所謂財技,企業的願景是創造社會價值而不是稅後獲利,管理的成果是如何達成共享經濟和競爭平衡,而不是開源節流。

大袋外表有料,裡面早已過期。過期春袋裡的過期精蟲,永遠生不出健康小孩。老細們最後斷尾求生,順勢切走埋個過期大春袋,閹閹一息,已經執返身彩啦。