眾新聞 Logo
眾新聞 CitizenNews
眾說

為咗「X心出行」中學要改校規?


依家香港有好多中學,都規定咗學生係唔可以將手機帶返學校度跟身嘅。有啲學校完全唔俾學生帶手機入學校,有啲就要求如果個別學生真係要帶手機嘅話,就要每朝早入到學校後將手機交出嚟放喺某個櫃入面鎖起佢,到放學時候先至可以再攞番部手機離開學校。

普遍中學嘅呢個校規做法,睇怕唔容易撐得幾耐。

因為特區政府宣布咗,由12月9號起,強制市民進入任何食肆前都必定要用「X心出行」掃一掃。香港大部分嘅中學生都係外出午膳嘅,咁嗰啲響應咗特區政府嘅呼籲,有超過七成師生打咗疫苗可以回復全日上課嘅學校,佢啲學生遲啲點樣食晏呀?

呢啲學校,一係改校規,俾學生帶手機入學校然後跟身;一係就預咗將來差不多全校學生都會帶手機返學,然後每朝早收一次手機、午膳前派一次手機、午膳後又再收一次手機、放學後又再派一次手機。清貧學生如果無 smartphone嘅話,就唯有自己帶飯,自己留喺學校食晏喇。

好快,呢啲中學會由唔鼓勵學生帶手機返學,變做要提醒學生記住要帶手機返學先至有飯食呀。

真係論盡。