眾新聞 Logo
眾新聞 CitizenNews
眾說

習慣與死神相遇的日子


【撰文:多明力】

送外賣工作數下手指都超過半年時間,一直以來都很少在網絡上提及到。因為想親自嘗試咗係香港唔會挑戰嘅嘢,了解清楚先去分享吓俾人知,才算得上資料正確,以免誤人子弟。再加上本人屬「報喜不報憂」類型,自己總喺覺得自己應付得來,頂得順嘅就唔算叫係捱得辛苦。亦都怕有啲嘢講咗出嚟,無意地令到家人額外多份擔憂。加上見到啲報憂不報喜嘅,唔想自己好似要去博得同情咁。但而家我要去面對同去學習一下,只比人見到所謂喜嘅一面,原來有啲人真係單純到,看到你只有網絡表面嘅生活。

外賣員孭住幾十斤重外賣箱騎單車。照片由筆者提供

回顧番試問又有幾多香港人試過騎住架單車,孭住幾十斤重外賣箱,每個月喺繁忙LDN市區踩過千公里嘅路呢?同以前係香港輕裝上陣,踩住架輕飄飄嘅公路車相比,係完全兩碼子兩回事囉!起碼呢大半年嚟知道,我未曾係市中心遇到過半個香港人做同行。夏天還好,著件短袖輕輕鬆鬆,踩完返到屋企仲係天光。而家開始入冬就知大檸樂,先唔講周不時大風大雨,玩淋濕身誘惑。入冬日短夜長關係,未收工已經天全黑,加上氣溫下降。喺得London 踩車,你要預咗要有左穿右插技術。如果你唔喺車與車半個身位穿穿插插,基本上你唔會夠時間完成到工作達標,同埋你有排都唔塞到返屋企啦。

照片由筆者提供
照片由筆者提供

問題就嚟喇,香港咁踩一定比人屌L到上天花板。但喺英國本地人,基本上呢個技能係先天性DNA,佢哋由幾歲開始已經由父母,係馬路上跟住前後去實戰。始終我係外來人,好彩有喺開香港同班車友捐窿捐罅嘅經驗,有個底喺度再經實戰一輪,都總算熟習到個模式上到軌道。我深信人哋做得嚟我又無理做唔掂嘅!

喺上幾個post都講過喺馬路上嘅風險,談論過如何避免一般危機。唔講大家可能唔知,每日喺眼前遇到的,大大小小意外都係十常八九。以前喺office或者喺屋企覺得係捱捱捱嘅,又點會感受到隨時面對生死日常呢?例如喺我前面踩住架電滑板車自炒瞓低,或見住架電單車比架車撞低無起身,單車都唔需要再多講。幸運地自己得到上天眷顧,大半年都無穿無爛咁平安回家,吃個老婆親手準備嘅溫暖住家飯,我已感到相當感恩幸福。試過最金頂盡都係傾盆大雨洗禮,入夜氣溫急降。但又要出力踩到個人身水身汗,面上都唔知係雨水還是汗水,同埋只有鼻水,但一定唔係男兒嘅淚水。眼鏡已濕到眼前只見到燈光嘅陰影,左穿右插經過五關斬六將之後,最終順利返到屋企先叫安全,不過就係咁第二日終於打敗仗病倒。開頭個月亦都試過踩半個鐘先返到屋企,返到樓下要食番大大份Gelato waffle嚟定吓驚!

照片由筆者提供

聽落你可以話有冇咁誇張,但我想講無論我描述得幾仔細,但文字上你都唔會感受到當下嗰份溫度同濕度,所以未親身試過真係唔會完全感受得到呢。話雖如此,到頭來自己覺得能力上又應付得來,又有自由時間空間,比我自己決定搵幾多個鐘錢。雖然要用勞力去換取合理工資,咁咪當操吓車又有錢賺囉。搵得來洗得去,心安理得又做得開心,何樂而不為?

嚟緊十二月真正入冬,氣溫低至零度頂多十度樓下,未計會落雪嘅日子來臨。所以我玩呢樣工作亦都可能會停咗先,又去搵過其他搵錢工作去維生。哎⋯我都係收番個「玩」字,以免招人誤會我對工作態度唔認真,只係玩玩吓嘅心態。我對自己工作係百分之百認真同投入,盡咗力未成功亦都唔想失敗嘅人。如果大家亦都想了解,或嘗識下呢類型嘅工作,不妨私下問吓我傾吓,我好樂意分享同介紹比大家。

聯絡作者:港人鏡頭在英國 hker in the uk