眾新聞 Logo
眾新聞 CitizenNews
眾說

公海旅遊咁開心,有乜保險可傍身?


【撰文:保險代理公司主席保險仔】

世事無常,一場沒完沒了嘅世紀大瘟疫,搞到各行各業,瞬間由盛轉衰。影響至甚嘅,非旅遊莫屬!連帶保險仔啲旅遊保險生意,都一朝清袋,欲哭無淚! 

咦!世事無絕對,港人對旅遊嘅熱衷,並冇因疫情而退減。旅行社推出嘅本地深度旅遊團,早受歡迎不在話下,近排(七月份開始)更有郵輪公司推出公海遊,短短一個月,就有兩萬人參加。至今,趨勢似愈來愈流行。哈!香港人呢份旅遊絕地反擊嘅能耐,真係唔到你唔服!

疫情下有郵輪公司推出公海遊,參加者眾。

「乜嘢係『公海旅遊』 ?」Bobo問(噚氣啲提一下,Bobo係保險仔個未婚honey!)。 

「公海遊係郵輪公司舉辦嘅海上旅遊,由香港出發至公海,全程有兩晚、三晚不等。中途不會靠岸,旅客只享受船上各種休憩、娛樂、賭場、美食等設施,然後返港。」 

「嘩!咁多人迫埋喺一艘郵輪裏面,會唔會又好似舊年喺日本嗰隻『鑽石公主號』咁,發生集體感染㗎?」Bobo嘅憂慮,都唔係冇道理。 

「呢樣又唔駛咁擔心。一則,參加者都係香港本地人,而香港本地感染幾乎日日清零,帶病毒感染者登船播毒嘅機會應該唔高。再者,遊輪公司有咗「鑽石公主號」嘅慘痛前科,必然採取各種杜絕集體感染嘅辦法。郵輪除咗設有檢疫設備,仲有預設40多間隔離房間;10間負壓室,以供給有需要隔離病人入住。就連空氣氣流,都特別處理過,並作單向流動,不作循環,避免因此而造成互相感染。此外,遊輪一經發現有感染個案,就會啟動應急機制,通報港府;停止船上所有活動,立刻啟航回港。」

Bobo聽罷,仍面帶疑惑,接着問道:「公海遊講明係遊公海,都冇目的地,咁有冇保險保㗎?」Bobo不枉同保險仔拍咗咁耐拖,保險意識果然強,抵錫! 

「問得好!其實一般旅遊保險,都會提供全球保障,只要係由香港出發到外地,即使冇入境其它地區,停留喺公海,都受到保單全面嘅保障。投保人喺填寫單次旅遊保險投保書時,喺目的地一欄,填寫:公海,咁就得喇!」呢次,Bobo似較先前寬容得多,接着又問:「乜唔係坐郵輪,就要買郵輪旅遊保險會啱啲嘅咩?」哈!Bobo對保險嘅問題,真係問得愈嚟愈有sense! 

「啱!郵輪旅遊保險係為郵輪旅遊度身訂造嘅保險產品,自然係更貼身啲!第一,保障額會比較大。此外,特殊嘅保障範圍,例如:衛星電話費用、郵輪沉沒保障等等,就唔係一般旅遊保險可以保到嘅。不過,羊毛出自羊身上,郵輪旅遊保險嘅保費就當然會貴啲啦! 

其實,一般嘅旅遊保險都會保埋上郵輪玩嘅。不論喺船上生病要睇郵輪專備嘅醫生、船上遇到人身意外受傷或死亡、行李喼壞咗、甚或得到重病未能出發,取消行程等,都受到保障。一般而言,保費會較郵輪旅遊保險便宜。至於要選擇邊一類保險,咁就豐儉由人,各取所需啦。」Bobo好似愈聽愈起勁,跟住又問:「係咁,係咪可以上船前,用網上或你哋個手機保險Apps買就得?」咦?Bobo問到咁詳細嘅? 

點買旅遊保險至着數? 

「可以,只要係出發前買就得喇。依家好多保險公司或代理,都設有網上投保,即買即出電子保單,唔受辦公時間或地點所限。更有個別公司,設有手機Apps,方便隨時隨地都可透過Apps,購買所需保險,極為方便。 

當然,作為行內人,建議投保人喺出發日期前一個月就購買旅遊保險,最為着數。因為「取消旅程保障」通常喺出發前30日就開始生效嘅。此外,旅遊保險通常係由離開住所一刻,就開始提供保障,直至行程完結,返回屋企為止。所以,去到碼頭先至買旅遊保險,咁就少咗好多應有嘅保障㗎。講開又講,如果遇有惡劣天氣,無可避免要延遲返港,旅遊保險亦會自動免費延長保期至多10日㗎。」 

Bobo聽罷,又顰眉相問:「咁,如果喺船上感染到新冠肺炎,旅遊保險又保唔保?」呢個問題認真到肉!「按照時下大部份保險公司提供嘅旅遊保險,都唔保障感染新冠肺炎嘅風險……」保險仔話口未完!「吓!咁點算呀?」Bobo就好緊張問道。 

「咁就要依靠醫療保險啦!一般嘅醫保,都會承保新冠肺炎,甚至保埋各變種新冠病毒。若手上嘅醫保,係提供亞洲/全球地區保障嘅話,順理成章,自然會保埋公海範圍。假若情況嚴重,要入住就近地區嘅醫院治療,都可以claim嘅。有啲醫保計劃,更設有提供住院現金保障添。(注意:亞洲醫療保障計劃只會保障在亞洲區內引起嘅醫療費用,而全球醫療保障計劃一般唔會保障在美國地區所引起之醫療費用。)

一般醫保已承保新冠肺炎,甚至連同各變種病毒都有保障。

個人意外保險

除咗醫療保險,個人意外保險都係提供全球保障嘅,所以亦會賠償喺公海發生嘅意外,導致身體傷亡同埋相關嘅醫療開支。有啲個人意外保險,仲會提供全球緊急援助服務,24小時免費提供緊急醫療撤離及遺體送返服務添。」 

Bobo面容稍稍放鬆,再追問道:「現時已經有唔少國家,採取『與病毒共存』政策,除咗快速大量為國民接種疫苗外,更同時逐步放寬旅遊限制,仲放寬檢疫措施,好似:新加坡、泰國布吉島、英國、法國、德國、芬蘭、冰島、美加等地咁,就免除咗我哋香港人入境隔離添,點解你哋啲保險界咁保守,冇與時並進,將新冠肺炎列為可保範圍?」 

旅遊保險涵蓋新冠肺炎指日可待 

Bobo所言極為有理,亦令保險仔一時語塞,支支吾吾答道:「哎……其實……係咁嘅,新冠肺炎造成全球性嘅感染同埋變種嘅速度,對保險界嚟講,係前所未有過嘅經驗,理解掌握需時。好在現時已經有成熟有效嘅疫苗,對治新冠疫情,有較大把握,使到保險公司對新冠疫情嘅風險評估同埋核保,亦有咗較客觀科學嘅依據。 

其實,近期已有保險公司將新冠肺炎納入旅遊保險保障範圍。目前,有保險公司為接種咗第一劑疫苗嘅旅遊保險投保人,提供新冠肺炎醫療費用保障。亦另有保險公司,將投保人喺旅程期間,不幸受感染新冠肺炎而引起嘅醫療費用開支,一一列為受保範圍。

有保險公司為接種了第一劑疫苗的旅遊保險投保人,提供新冠肺炎醫療保障。

相信有咗呢兩家保險公司做領頭羊下,好快就有其他保險公司跟隨,將新冠肺炎列為常規保障,呢個情況,指日可待!」Bobo聽罷,面有喜色,嬌嗲道:「既然有齊晒各種保險保障,係咁,我哋係咪可以立刻報團參加公海遊呢?」哈哈!怪唔之Bobo一連串嘅問題,問得咁到肉又兼富有引導性,等保險仔最後冇得say no!冰雪聰明呢!睇嚟今次嘅公海遊都係走唔甩㗎喇! 

作者簡介:保險仔,從事一般保險中介服務達四十年,期間,經歷保險市場及政府對行業的行為規管,隨時日不斷改進,日益成熟。目前,現職保險代理公司主席。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe