眾新聞 Logo
眾新聞 CitizenNews
眾聞

【東奧英雄·香港欄王專訪】首位踏足奧運跨欄港將 陳仲泓棄高薪厚職 堅持追夢:怕40歲回望時後悔


香港的精英運動員,大部分都是自小接受培訓,經過長年累月的訓練,一步一步向頂尖運動員的道路發展,因為運動員生涯很短暫,可能只是數年至十多年,運動員踏入30歲,已經被視為「老將」。

講求速度與力量的田徑比賽,運動員的競技年齡比其他運動短,退役時間也更早。今年30歲的「香港欄王」陳仲泓(Arenas),13年前受劉翔影響開始接觸跨欄,他並非贏在起跑線,但憑著自身的努力,4年前辭工去追夢,這幾年間不斷打破香港紀錄,亦成為首位香港人參與奧運男子跨欄比賽。

陳仲泓身高186cm,腳長110cm,天賦身材令他在跨欄場上比其他香港選手更有優勢。周滿鏗攝

身高186cm,高挑的身材,清爽的髮型,臉上總是掛着燦爛笑容,典型陽光男孩的陳仲泓,想不到訪問時變得羞澀,自言不善辭令的他面對鏡頭有點不知所措。不過,害羞不等於膽怯。人越大,擁有的東西越多,可能甘於現狀便越難走出舒適圈,面前的大男孩卻選擇一條不一樣的路。

21歲便投入職場的陳仲泓,26歲時毅然辭去高薪糧準的配藥員工作,捨棄安穩生活,換了另一條跑道,「其實辭職呢個念頭,係因為我跑步上面遇到一啲樽頸位,忽然有呢個想法,當時我同教練都plan去2018年亞運,但如果我每日拎個好攰嘅身體去操練嘅話,我同教練都知道真係會好難去到,因為我本身返工都係要企嘅,放工之後仲要由元朗搭車出灣仔練,收工個人已經好攰,所以就算努力練習成績都唔太理想」。

「有一日返工,突然有個想法:『不如試吓啦!』,我當時同而家都覺得,如果我唔去試嘅話,去到40歲,我望返轉頭,我會後悔囉!真係博㗎咋,不過我成日都覺得,你要行出第一步,你先會知道之後係點。」

陳仲泓是110米跨欄比賽中的香港紀錄保持者。香港業餘田徑總會圖片

母親不贊成轉全職運動員 藉讀大學進修來爭取

他憶述當初自己打算「裸辭」,衡量過風險實在太大,所以選擇入讀浸會大學體育及康樂管理進修,在學術上裝備自己,希望退役後的道路會更加廣闊。他笑言母親當初不贊成他轉行的決定,所以讀書也成為他其中一個手段去說服她,「讀書個Bargaining power會大啲,哈哈!」

陳仲泓指母親當初不想他成為全職運動員,擔心他經濟上有困難,因為陳仲泓的跨欄成績最初未達到香港體育學院精英運動員的資助標準,但他仍然決定自資全職田徑訓練:「我2017年轉全職,但我係2018年3、4月左右先開始攞資助,一開頭6000蚊左右,我相信呢個亦都係媽咪擔心我嘅原因。」根據體育學院的精英訓練資助準則,現時的陳仲泓屬「精英丙(Elite C)」,每月薪酬只有11,000元。

陳仲泓日前從港協暨奧委會會長霍震霆手上接過表揚狀。周滿鏗攝

雖然香港體育學院向所有入住的運動員提供膳食及住宿,但作為一個成年男人,最初月入只有6000元的他,究竟是如何生活?陳仲泓遲疑一會兒,苦笑道:「對我嚟講其實就差唔多,因為我本身唔係好大使、買好多嘢,但係就無得俾家用囉。我覺得6000幾蚊真係純粹夠生活,你要計住自己每日最多係洗200蚊,但加埋搭車,基本上都儲唔到錢。」 

香港代表團於今屆東京奧運取得歷史佳績,特區政府與港協暨奧委會舉辦代表團返港歡迎儀式,向運動員頒發表揚狀。周滿鏗攝

今屆東京奧運香港代表團取得歷來奧運的最佳成績,隨即令人關注現時運動員的待遇。

體院奉行精英資助制,運動員的薪金是依據比賽成績而定,一次比賽分分鐘決定翌年薪酬,陳仲泓認為制度上絕對有改善空間。他提到香港運動員基金中有一個名為「精英運動員優秀表現嘉許計劃」,目的是為退役運動員提供一筆過資助,支援他們退役後轉型發展,但申請基金的運動員,必須曾接受最少8年的全職訓練,他認為門檻太高,並不是太多運動員能夠受惠。

退役申領資助門檻高 精英運動員亦難受惠

「以我所知做夠8年或者10年,先會有嗰份退休金,我覺得有時可以按返個比例去俾運動員,即係我做咗5年精英,唔通我就唔係精英咩?咁我都係全職運動員嚟㗎嘛,所以我覺得呢個係最大嘅改善空間。」他認為即使退休金金額高,但照顧不到較短年期,如7年或以下的全職運動員,「有啲運動員係7年要捱到去8年,真係一個關口嚟。」

陳仲泓相信,香港不會有太多全職田徑運動員,因為田徑在香港本土的競爭已經好大,更何況要出到亞洲賽及世界賽,除非該運動員能夠達到體院標準,否則不會有人願意投身全職運動員的行列。

他補充:「就算你達標,之後你屋企人係咪會support你?可能而家成年精英普通嘅標準資助係7000元,屋企會唔會俾空間你去發展先?如果你屋企環境唔得嘅,咁呢度已經係落咗第一道閘,第二道閘就係你嘅身體質素啦,因為我去過好多比賽,個個都高過我,呢個係第二個條件,所以某程度上都係點解跨欄唔多人玩嘅原因囉。」 

陳仲泓認為跨欄在香港屬冷門運動。香港業餘田徑總會圖片

訪問前夕,記者四處搜尋跨欄比賽中的標準欄,打算讓「香港欄王」一顯身手,卻發現跨欄架原來在香港屬冷門的體育用品,就算一般的康文署運動場也不會借用予香港市民使用,意味着在香港跨欄的人實屬少數。

陳仲泓也同意跨欄在香港屬冷門運動,「我自己就係2008年先開始玩跨欄,因為嗰陣時劉翔曾經好勁,破晒紀錄,贏咗好多大賽,好多人都係受到嗰陣嘅熱潮影響而玩。」

陳仲泓認為跨欄這項運動,難以在香港進行推廣,因為資源有限。周滿鏗攝

在港屬冷門運動 自備欄架入場訓練被拒

他說中學才開始接觸跨欄,當時是借用學校的欄作訓練之用,但如果在學校訓練,場地始終有限,與正式的運動場訓練有很大分別,「所以我覺得跨欄好難普及化,始終跨欄唔似100米、200米咁,就咁落運動場就可以練到,因為好多運動場都會擔心公眾安全嘅問題,所以都唔會俾你喺運動場自己跨欄,就算你由學校自己帶啲欄去運動場跨都唔得,真係比較難推廣,所以如果真係想喺香港多啲人玩跨欄嘅話,真係唔係咁簡單。」

跨欄比一般短跑的技術複雜,對運動員的身體全面要求亦較高,而且在香港也不普及,訓練掣肘也比其他田徑項目大,但陳仲泓卻被這獨特的田徑項目所深深吸引,「跨欄係一種好刺激嘅運動,因為唔似100米、200米咁,100米得嗰十秒左右,如果你開個局開得好靚嘅話,拉得好遠,基本上大局已定。但跨欄特別之處係,你唔去到最後一個欄,都唔知邊個贏,因為可能你領先咗九個欄,但係第十個欄你唔小心撞親,咁你撞親個欄,就減咗啲速,呢個係我覺得好刺激嘅地方。」

「我覺得跨欄帶俾我最多得着係,個人改變咗,最重要就係我遇到我而家嘅教練陳沛。喺訓練當中,佢都灌輸咗好多堅持、俾多啲耐性嘅精神我,因為我以前係一個幾無耐性,好容易就放棄嘅人,無乜目標。但接觸咗跨欄之後,我覺得成個人好似忽然多咗好多目標,你會知道一步一步,向住嗰個方向行,有機會做到,而唔係好無方向感。」 

陳仲泓和他的教練陳沛(左)都視踏足奧運賽場為夢想,這次雖然成績未如理想,但總算一起完成了這項任務。受訪者提供

他多次強調,從小就喜愛足球,足球才是他最喜愛的運動。但因為選擇了跨欄,已經告別足球場多年,因為踢足球容易受傷,所以作為田徑運動員的他,無奈接受「禁足」的現實。被問到若重來一次,他希望自己向綠茵草場發展,還是仍然選擇在田徑場上馳騁?

「我都係會揀跨欄。因為足球係一個團隊運動,有時太難去配合,呢個運動唔係踢一個而係踢十一個,所以有時你好努力付出,唔一定有收獲,因為係團隊運動,就係要成Team人一條心,所以對比呢一樣嘢,跨欄係會較容易啲做到。同埋足球競爭都幾大,咁啱我又生得比較高,喺跨欄上面會有多少少優勢,所以再俾我揀多次,我都係會揀跨欄,因為相信最後個發展應該都係會比較好。」

陳仲泓在今屆東京奧運110米欄初賽第四組亮相,不但是香港今屆唯一田徑男子運動員,亦是首位能出戰奧運跨欄項目的香港男子運動員。網上直播截圖

在東奧實現3個願望 與偶像Grant Holloway合照

陳仲泓最終在東奧跑出14.23秒,以第8名完成,未能成功晉級,他坦言對自己的表現不太滿意,「我覺得有遺憾嘅係,唔可以用自己最好狀態,100%嘅狀態去跑,因為我太耐無出過去比賽,就變咗喺場上面想跟佢哋嘅時候就略嫌心急咗,都撞得幾多欄。」

他承認自己表現的確受到疫情影響,因為由2019年7月開始,他沒有再出國與其他選手比賽,一直去到今年才開始有少許零星香港本土賽事,所以在節奏上並不太跟到其他世界級選手的速度,在比賽時發揮不到自己最理想的狀態。

延後一年的東奧,令陳仲泓有機會在奧運五環前穿上畢業袍。受訪者提供

雖然成績不似預期,但陳仲泓賽前有3個心願希望能在東奧實現,最終就如願以償。他說:「着住畢業袍到彩虹橋奧運五環影畢業相、向其他世界級選手偷師,最後就係同我偶像Grant Holloway(美國跨欄選手)影相,全部都做到。而且真係大開眼界,可以睇到我同世界級運動員嘅距離,睇到佢哋熱身同埋跑落去時候嘅技術。」

陳仲泓與偶像美國跨欄選手Grant Holloway合照。受訪者提供

被問到會否希望參與下屆巴黎奧運,陳仲泓則表示會先將目標放在來年的杭州亞運會,「未有諗到咁遠,暫時會專注返喺未來一年嘅訓練同比賽先,唔會將個目標放咁遠住,踏實啲一步一步先,希望喺下年亞運做到好成績。」

在香港做運動員從來不容易,陳仲泓認為如果有年輕人視全職運動員為目標,他想跟他們說一句話:「我覺得一啲鼓勵嘅說話,都無得講咁多喇,我覺得最緊要係認清楚自己嘅目標,同埋如果真係決心要做嘅,唔好望返轉頭,一定要堅持落去。」

陳仲泓認為年輕運動員,最重要是認清楚自己的目標,堅持下去,不要回望過去。周滿鏗攝


陳仲泓(Chan Chung Wang)

出生日期:1991年6月10日

香港紀錄:男子110米跨欄(13秒74)




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe