眾新聞 Logo
眾新聞 CitizenNews
眾聞

【告別蘋果後‧1】重生的幼苗 前員工自組平台 盼擺脫《蘋果》影子


蘋果樹倒下,埋在泥土裡的果實,長出一棵棵幼苗。它們離開蘋果樹的蔭庇,獨自茁壯成長。

壹傳媒停運至今一個多月,多個由前壹傳媒員工成立的網上平台和「自媒體」陸續成立。眾新聞專訪「餓底TV」和「Channel C」,他們因《蘋果》停運而生,但同樣希望擺脫《蘋果》影子,建立屬於自己的風格,重新出發。

可是針對《蘋果》的清算似乎山雨欲來,他們擔心嗎? 

「餓底TV」成員Jonathan說得直白:「如果我出嚟報餐廳,出嚟食買玩都拉嘅,咁我無嘢好講啦。」

「Channel C」成員James反問:「咁我係咪唔需要生活呢?我哋都要生活㗎嘛,我係咪日日咩都唔使做,喺屋企吽呢?係咪政府養我呢?係又唔錯喎。」 

「Channel C」盼重現動新聞輕鬆風格

一個多月前,《蘋果日報》在雨中告別港人,年逾30的Sammi與James(均為化名)在《蘋果》工作近10年,Sammi任職記者,James則專責動新聞,二人頓時失業。Sammi在求職期間,燃起自立門戶的想法,便開始邀請相熟同事加入。

James憶述,當初收到Sammi邀請後,便旋即決定加入,因自《蘋果》停運後,他一直想繼續從事影片製作,但感覺其他傳媒較「正經」,與過去在動新聞的做片風格不同,因此決定加入,成立平台。

Channel C在今年7月中成立。Channel C Facebook截圖

「Channel C」旨在重現動新聞的風格,James指出:「想知件事,又唔想咁heavy(沉重)⋯⋯ 動新聞一分零鐘,可能搞搞笑笑,有時mean下串下,咁就一條片。」讓港人開心笑一笑,是平台建立的初衷,「始終而家呢個社會,大家都唔係好開心,我哋嘅工作就係氹人開心。」

你話用一個好輕鬆嘅態度,去睇一件事,喺市場真係無,呢個係動新聞發展10年得出嘅風格。比較相近的以前有《頭條新聞》,但而家《頭條新聞》都無埋,我唔想無咗呢種片嘅風格,保留返呢種感覺俾大家。

「Channel C」每日會按照社會的熱門議題,選擇報道題材,不論是政治、文化,還是娛樂、體育都會涉獵。例如上月組合Mirror和Error到屯門出席活動掀起熱潮,平台便把握先機報道。James說:「我哋嘅格言就係:『人哋唔做就我哋做,人哋未做我哋先做』。即係好似Mirror,星期三仲傳緊,我哋已經落咗去屯門做啦。到真係開波嗰日,我哋就唔去屯門啦,因為屯門太多人,我哋一定唔夠做,所以就去咗奧海城,因為奧海城無人做。」

組合Mirror和Error上月到屯門一個商場出席活動,Channel C派人到TVB於奧海城一個活動採訪,對比兩者到場的支持者人數。Channel C Facebook截圖

跟以往在《蘋果》工作相比,他們覺得最大分別是現在「一腳踢」,由購買器材、決定報道題材,到採訪、剪片都要一手包辦。但現在的優勢,在於更靈活、更自由。「(以前)例如我哋想做Mirror,娛樂做咗啦喎,我哋仲做唔做好?可能會有呢啲考慮,因為以前唔同部組有唔同分工。而家無咗分工,我哋做乜都得,所以靈活度更加強,發揮更加大。」

James相信,「Channel C」的製作與報道能吸納不同觀眾,有信心能持續營運。「不論左中右,好睇嘅嘢大家都鍾意睇㗎啦。我哋就係做呢樣嘢,希望唔係淨係『黃』嗰邊,希望『藍』嗰邊睇到都覺得幾過癮喎,咁我哋又成功啦。」

「我諗片一定有人睇掛,舉個例習大大都要睇片啦,梁振英之前都要睇《蘋果》㗎啦。」他半開玩笑地說:「我哋希望可以滿足返梁振英嘅心靈!」

資料圖片

《飲食男女》年輕班底自組「餓底TV」 

成立約一個月的「餓底TV」,由6名前《飲食男女》成員組成。成員之一的Jonathan憶述,早於《蘋果》正式停運前的星期一,公司內部基本上已肯定那個星期內會停運。當晚他與兩名同事一同放工,談起萬一公司倒閉,便應該開設一個新平台,又自覺有能力做到,遂著手計劃。Jonathan開始接觸同事,不少人一口答應,短短數天便集齊「餓底TV」團隊,到《蘋果》停運後的星期日便正式「開台」。 

說起創立「餓底TV」的初衷,加入《飲食男女》近5年的Jonathan坦言沒有甚麼崇高的理念,只想一心延續專長的工作。「其實真係無諗咁多,純粹想繼續採訪,繼續出去拍片,搵嘢食,繼續有片出。真係無諗過有無糧出,有無錢啊,純粹想開個channel,繼續做返以前做緊嘅嘢。」 

另一成員Icy於3年前大學實習時加入《飲食男女》,從實習生變成兼職記者,再轉為全職,早已跟同事建立深厚感情,亦習慣了公司文化。因此當Jonathan邀請她加入「餓底TV」時,她不假思索便答應。「假設我可以去其他公司,但係你做慣咗(飲食男女)呢,可能個文化、個style有唔同。始終唔同公司嘅style,可能你又唔想做嗰種style。」

餓底TV於《蘋果》停運後的星期日成立。餓底TV Facebook截圖

怕負金漆招牌 盼洗「老牌」味道

創刊24年的《飲食男女》,陪伴一代代港人成長,成為香港首屈一指的飲食和旅遊的雜誌。在《蘋果》停運下,這本講玩講食的雜誌也難逃厄運。Jonathan坦言,開台前曾掙扎應否打著《飲食男女》旗號。

如果不提《飲食男女》,便「唔會有人知,唔會有人識」;另一邊廂又擔心,新平台沒能力背負《飲食男女》的金漆招牌。「啲人會對你有一個期待,我可唔可以fulfill到觀眾嘅期望⋯⋯ 淆底嘅,我驚啲人話我呃人囉。」Icy如是說。 

Jonathan亦笑言,《飲食男女》的權威猶如「上咗神枱」:「我覺得我哋高攀唔起《飲食男女》呢個名,呢個名好重,我哋真係揹唔起呢個名。」 

背負《飲食男女》之名,既是壓力,也是動力。他們笑言,凌晨開設社交網站後,翌晨醒來便有逾3萬個讚好,實在喜出望外,同時自覺要做好內容,不能辜負支持者的期望。

《飲食男女》創刊24年,被譽為香港最成功的飲食雜誌。資料圖片

開台初期,他們承認如食譜、「試伏器」等不少《飲食男女》的經典欄目和系列,暫時未能做到。他們的理念,是希望減少報道高級、昂貴的食府,主力集中訪問更多小店。與坊間不少飲食頻道和KOL相比,Jonathan強調他們從飲食雜誌界的「木人巷」出身,拍攝和報道角度更專業,不只介紹食物與否,更會訪問食客、廚師,了解食材從何而來、菜底和餐廳的理念等。Icy補充道:「即係唔係就咁話『好味!好滑!』」 

Jonathan與Icy自言,「餓底TV」是《飲食男女》較年輕的一面,銳意洗脫《飲食男女》有時較「老牌」的味道。「我哋基本上係《飲食男女》嘅另一面,young啲嘅一面。因為其實好多新啲嘅題材,都係我哋自己做,例如『90後真人show』。」過去他們有些新構思,例如想以vlog的形式拍攝,但《飲食男女》的定位較傳統,不能有太多新潮元素。反之,現在可更「天馬行空」,製作更多元化、生活化的題材。

「餓底TV」目前由幾名成員自資組營,早前開展會員制,Jonathan表示目標是每月有約10萬元收入,至少能讓一眾成員「有糧出」。

「餓底TV」Facebook截圖

風格內容不敏感 毋懼紅線或清算  

7月中,當局再落案控告前《蘋果》執行總編輯林文宗、副社長陳沛敏等4名高層,保安局局長鄧炳強明言,如果《蘋果》前員工在工作期間發現有人違反國安法,便應該報警。「清算」似乎山雨欲來,但兩個平台都認為,他們目前涉獵的題材不算敏感,不怕觸碰政權的紅線。

「餓底TV」的Jonathan說得直白:「如果我出嚟報餐廳,出嚟食買玩都拉嘅,咁我無嘢好講啦。」他指內容風格亦甚少觸及敏感題材︰「我哋係做食買玩,一啲副刊啲、lifestyle啲嘅嘢,好少掂到啲敏感嘅題材。咁如果真係掂到,例如黃藍店呢啲,咪盡量寫得mild啲。」 

前《蘋果》執行總編輯林文宗、副社長陳沛敏上月中被控違反國安法。資料圖片

政治環境愈趨緊張下,前《蘋果》員工各自成立新平台,不少人擔心他們或會被政權緊盯,甚至被視為保存《蘋果》的實力。James覺得,若這是政權的詮釋,他們擔心不來。「其實佢哋講乜都得㗎,佢話有前《蘋果》員工轉行執垃圾,人力物力仍在,佢擺咩行業都得㗎喎⋯⋯我哋做譚仔,都係保持住人力物力㗎喎;我哋去揸的士,都係保持緊人力物力。除非我死咗㗎啫!除非我而家話我退休啦、金盤洗手。」

咁我係咪唔需要生活呢?我哋都要生活㗎嘛。我哋去賣衫,都係保存實力嘅一種㗎。咁我係咪日日咩都唔使做,喺屋企吽呢?係咪政府養我呢?係又唔錯喎。

社會氣氛緊張,曾在《蘋果》工作可會已成「原罪」?James反駁:「罪就係我犯咗罪,所以先至有個罪孽喺度。咁我都無犯罪。」他自言只是打工仔,但因前《蘋果》員工身份而遭受「歧視」︰「政府成日話唔好歧視人,但係我而家就係被歧視嗰個,咁究竟我犯咗咩罪呢?我又無犯罪。我都係一個打工仔,點解你要歧視我喺邊度做過呢?」

今年6月,大批警隊國安處警員搜查壹傳媒大樓。資料圖片

因《蘋果》停運而生 盼擺脫過去影子

兩個平台因《蘋果》停運而生,但同樣盼望終有一天能擺脫《蘋果》的影子,重新出發。

「其實所有嘢都係一個新嘅開始,不過我哋嘅起跑線,係《飲食男女》嘅結束⋯⋯就算我開返個《飲食女男》出嚟,都已經唔係嗰樣嘢;就算你gather返大家再去做,都已經唔同。」餓底TV的Icy滿懷希望道:

我嘅期望好特別㗎,就係想擺脫《飲食男女》呢個名。我都唔想長久背負住《飲食男女》呢個名,我哋都想做到自己嘅形象,自己嘅style出嚟。

「Channel C」亦期望開拓新方向,未來除了動新聞風格的影片,亦會製作文教資訊類節目。Sammi直言:「我哋連個名都無同《蘋果》特別相關,希望係一個新嘅平台,去搵新嘅空間。即使開始嘅時候,我哋有一啲《蘋果》嘅影子,都希望未來嘅發展,搵到自己新嘅路。」

未必個個同事都可以有機會做返自己鍾意做嘅嘢,我覺得有機會咪去試囉,唔需要諗太多,自己收窄自己個空間。我哋去摸索,睇下做到啲乜嘢囉。我覺得展望將來,仲好過諗過去係點,諗我哋係咩身份。
《蘋果》員工在停運當晚,高舉手機燈向市民道別。資料圖片



請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe