眾新聞 Logo
眾新聞 CitizenNews
眾聞

一家四口到維園悼六四 「悼念是香港人的約定 不需煽動鼓吹」


我好記得支聯會97前講過,如果有一日晚會唔能夠舉行嘅話,大家都係返嗰一日、嗰個時間,去返嗰個地方,呢個係一個香港人嘅約定,即係唔需要任何人去所謂宣傳、鼓動,呢樣嘢係植根喺香港人嘅心裡面。

今年45歲的周先生,與太太帶同9歲的女兒和7歲的兒子到維園外悼念六四。他直言,每年的六四悼念集會是香港人的約定,植根於每名港人心中,不需任何人鼓吹、煽動。

周先生一家四在維園外。鄭啟智攝

維園空無一人證一國兩制處境  堅持到場「唔可以當件事無咗」

周先生慨嘆,六四燭光集會作為一國兩制的指標,也是一個「終極和理非」的活動,「明眼人係見到發生緊咩事」。他稱今晚維園足球場空無一人的相片,與過去31年的點點燭光相比,能讓世界看見一國兩制的處境。「一張相片,勝於千言萬語,香港嘅一國兩制、高度自治,就係已經去到呢個地步,俾人見得到。」

即使警方封閉維園,周先生仍堅持到場,因為他相信有些事情需要堅持。「我會覺得今年你唔俾我哋入,但係代唔代表我哋就可以唔去發聲,又或者我哋就可以當件事無咗呢?你可以話呢個係我哋嗰一代香港人嘅情意結,6月4號晚喺維園有一個聚集,每一個人心裡面都可能有啲唔同嘅諗法,但我哋嘅心都一樣,去紀念一班曾經犧牲嘅人,我覺得需要將呢樣嘢繼續落去。」

六四事件32周年,維園足球場空無一人。鄭卓伶攝

告訴子女「其實應該可以入維園」 盼他們珍惜自由

六四事件發生時,周先生就讀中一,當年亦曾上街聲援北京學生。他形容六四是他成長的印記,難以磨滅。「我覺得記憶係好重要,即係人類嗰個歷史上嘅記憶需要傳承落去,唔好令當年一件咁不公不義嘅事被遺忘咗。」

過去周先生曾帶小朋友出席六四燭光集會,今晚再帶他們前來,打算在維園外走一走,不僅想傳承記憶,更希望下一代能夠明白今晚一眾港人在維園外手持電筒、燭光,是所為何事。

我只能夠話俾佢哋聽,過去我哋入到去,我哋今年入唔到去,但係其實我哋應該可以入去。有一啲權利應該係與生俱來,唔係你賜俾我,係我天生應該有。
希望佢哋能夠知道,有啲嘢我哋係需要珍惜。唔好以為今年唔嚟咪下年嚟囉,將來仲有機會,但係原來有啲嘢可以一夜之間無咗,我哋嘅好多嘅自由、權利,好多嘢都慢慢失去。

周先生希望小朋友能警覺港人正慢慢失去應有的自由和權利,明白有些事要堅持,不能習慣失去示威自由,不能讓六四的記憶慢慢淡化。

市民在銅鑼灣街頭點起燭光。鄭啟智攝

傳承記憶  盼在下一代心中播種 

他覺得,不能強求下一代對六四有相同的看法和態度,但最少要傳承記憶,不能遺忘歷史。「點解一啲國家不斷犯錯,就係佢哋唔去深切記住一啲歷史、一啲錯、一啲痛、一啲做得唔啱嘅嘢,而你就抹咗佢,跟住繼續去犯嗰啲錯,你係唔會進步㗎。」

傳承未必有一個作用㗎可能都,最後佢可能都無你一個咁大嘅impression⋯⋯ 但係如果我將呢樣嘢繼續同佢講嘅時候,起碼佢心裡面知道有呢樣嘢,我喺佢心裡面播咗種,我唔知嗰個苗會唔會發到出嚟,我唔知佢將來會唔會開花結果,但係起碼我做咗我能夠做嘅嘢。



請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe