眾新聞 Logo
眾新聞 CitizenNews
眾聞

聯署促改善獄中酷熱環境 邵家臻:獄政問題存多年 非政治犯特別「唔捱得」


關注在囚人士的組織「石牆花」上周五(21日)發起「十萬。火急。行動」聯署,希望懲教署以人道理由,舒緩監房酷熱問題,成功在33個小時內收集10萬人簽名。天氣炎熱,但囚友只能飲熱水;倉內窗戶小而閘門密封難以散熱;在太陽曝曬下凍水涼也變熱水涼;飯枱工作枱全是鐵和不銹鋼等傳熱物料;女囚友甚至不能穿短褲。

組織創辦人、前立法會議員邵家臻說,熱到中暑、熱衰竭的例子比比皆是,但每每向懲教署查詢情況,對方只會拋下官式回答,稱沒有統計數字。

組織曾於上周日(23日)去信懲教署署長要求會面,本周四(27日)收到答覆,惟一字未有提及會面安排,僅重覆早前曾回應過的內容。邵家臻批評署方回覆只是「炒冷飯」,更在社交網站無奈道「等落雨快過等懲教署署長回應開會安排」,希望署方能積極和實際回應訴求。

邵家臻關心囚權多年,他指獄政問題一直存在,並非因有大量議員、政治人物入獄才無故而生,而是以前社會總是覺得「監獄同我好遠」、或者「嗰班人係犯、係有餘辜」,然而現在政治犯的比例增加,大眾開始思考獄中政策不公平或不人道的地方。

他直言:「以前一直就係,關你X事咩?但依家唔係,依家係他朝君體也相同。」

聯署建議容許家屬入防中暑物資(如退熱貼、太陽油等)、增設凍水供應、增加沖涼次數及於監房頂層和外牆髹上隔熱塗層等。對於以上建議,以及要求約見懲教署署長,署方並未有正面回應,只在電郵回覆中,重複強調懲教署一直以來已持續採取多項措施,改善監獄內的羈押環境,包括更換風扇、將加裝牛角扇、安裝新式閘門及窗戶,以及分階段安裝防自殺設計的滾筒扇。

懲教署今早電郵回覆。黎卓欣攝
邵家臻向記者繪畫示意圖,新閘(左)比舊閘(右)更通風。黎卓欣攝

不過,邵家臻最近從囚友口中打聽到,聯署發佈後署方其實有作出一些改善措施。赤柱監獄頂層三樓最熱,加上是二人一倉,環境更為侷促。現時做法是將部分原在三樓囚禁的囚友搬到地下,繼續二人一倉;或繼續留在三樓,但改為單獨囚禁。第二種做法是加設噴水裝置,邵家臻形容是「土製涼風機」,署方在倉外走廊放置能製造霧氣的大型機器,但有時「有機無水」,結果只在噴熱風。

早前懲教署曾拒絕接受新包裝的朱古力,擾攘多時才更新探監物資列表。轉包裝尚且要三番四次溝通才有改善,何況要署方接受新物資?邵家臻聞言反問:「如果唔肯做就咩都難!難在唔係技術,難在於佢嘅面子,佢點解要聽你講?」

他苦笑道,今次懲教的回應已算是快和正面,但強調署方的回覆只是「炒冷飯」:「雖然咁樣講係好悲哀。第一、牛角扇係炒冷飯、係公關,你用2019年嘅措施嚟回應我21年嘅簽名運動。第二,佢話加滾筒扇,但下年第二季先可以加到1500個囚室。由研究、試驗到加裝,足足用咗三年。」

「佢咁嘅回應已經唔係好defensive,懲教係好defensive,但係佢今次無同你話:唔熱呀、監房唔熱、監房不知幾涼,無人熱!起碼佢冇講啲咁嘅嘢 .... 」

邵家臻曾就女囚犯四季只能穿長褲的問題,去信申訴專員公署,質疑為何男性可以穿短褲,女性則被禁止。但署方要求「受屈人」親自投訴,不能由他代筆。

是否由女囚友親筆寫信投訴便可以?

邵家臻馬上搖頭:「梗係可以,但點解無呢?因為一舉手就畀人『釘倉』喇嘛!『未投訴、先找數』呀嘛!要明白呢啲嘢每日都發生緊,但點解一直無人講呢?」

獄政問題一直存在:以前社會覺得「監獄同我好遠」、「嗰班人係犯」

邵家臻常道,對於囚權來說,這是最壞的年代,也是最好的年代。

邵家臻說,爭取改善囚權並非只為了政治犯,而是惠及7000多名囚友。黎卓欣攝

「最壞嘅意思係:濫捕濫告濫囚錮。但就正正因為濫捕濫告濫囚錮,好多無辜、特別係同政治有關嘅人被收押,於是我哋開始關心佢,從而關心到監獄嘅政策。」

他舉例,大眾藉由毛孟靜開始了解羅湖懲教所的問題:「例如你望住Miss Mo,佢本來就唔應該坐監,佢要坐監大家已經好心痛,而佢仲要捱呢啲嘢,大家更心痛。於是乎透過Miss Mo,我哋就會關心到羅湖女子監獄嘅問題。」

關心囚權多年,邵家臻認為獄政問題一直都在,只是在於社會的心態有所改變,讓問題浮上水面。

「過往有兩個文化因素,第一個係『監獄同我好遠』,第二個係『嗰班人係犯』。每當有不公平,或者不人道嘅嘢發生,你第一個反應就係:嗰個係犯嚟架喎,家暴、黑社會、收數、吸毒.... 咁好似有餘辜。」

「就算係好慘,啲人總係覺得同自己好遠,但今時今日近咗好多。我以前會聽人講話,醫院同你好近;經濟唔好嘅時候,就會話社會保障綜援辦事處同你好近,話唔埋會到你拎綜援。今日就係第三樣嘢,話唔埋你會坐監,或者你身邊嘅人隨時會面對司法程序。以前一直就係,關你X事咩?」

思考一會,他又補充:「但依家唔係,依家係他朝君體也相同。」

邵家臻說,會持續跟進懲教更換風扇、安裝牛角扇及滾筒扇的進度,並重申要求與懲教署署長會面。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe