眾新聞 Logo
眾新聞 CitizenNews
眾聞

【鏡粉熱潮】靚媽:追MIRROR拉近與孩子距離 後援會管理員:比追韓星更滿足


人氣男團MIRROR本周四(6日)起在九展舉行一連六場演唱會,距離開場還有大半天,已有不少粉絲到場,氣氛高漲。場內「鏡粉」大部分都是女性,喜愛MIRROR的人不分老嫩,有50多歲的姨姨與友好來湊熱鬧,也有還在讀幼稚園的小粉絲,問她想去迪士尼還是睇Ian?小妹妹秒速回答︰「Ian﹗」

場外設有紀念品攤位,每日下午5時起開放,有人一早排隊,擔心遲來買不到周邊產品;有人為偶像甘願出心出力,專程請假義務到場幫忙派紀念品;也有人即使沒有演唱會飛,只來與易拉架上的偶像拍照,也夠心花怒放。

近五、六百名「鏡粉」排隊拍照、領取紀念品時一度塞滿九展各層空地,久違了的歡欣和人氣,重現眼前。

港人追星捨得花錢,各粉絲後援會一早已到達現場作準備,聯乘設置印有MIRROR成員樣貌的易拉架、LED燈牌及花藍,並於每位觀眾的座位上放置祝賀手幅,每日數量超過2700張,更會轉換款式。後援會亦各自推出每位成員的專屬應援紀念品,部分須事前預購,部分每晚5時起會免費派發。

其中,呂爵安(Edan Lui)粉絲後援會的管理員MAY豪擲數千元買足六場,又請假幫忙派發紀念品,笑言事後收到Edan回覆,覺得再辛苦也值得。曾是忠實韓迷的May,認為追港星比追韓星更有滿足感,因為至少沒有溝通問題,又能近距離接觸,對方甚至會認得她。她坦言,MIRROR最近討論度及受歡迎程度大增,或多或少也是受社會運動及疫情影響:「本土意識強咗,大家想有返廣東歌,想多啲人留意香港樂壇。」

化著淡妝、身穿白襯衫的張太則說,自己因為孩子推薦,才開始接觸《全民造星》。談到上一個令她如此瘋狂的偶像,她不禁掩面大笑:「已經係中學嗰時鍾意鄭伊健,小學鍾意黎明!慘嘞,係咪暴露年齡?」在愛上MIRROR之前,張太最愛煲韓劇,坦言有好一段時間,已無如此為本地藝人著迷:「有聽但唔會話超級好鍾意,可能嗰陣覺得自己年紀大咗。但喺《全民造星》見到MIRROR呢班人好努力,有時都真係好感動。」

張太認為自己喜愛MIRROR,很大原因是能與孩子拉近距離:「佢哋都鍾意嘅時候,大家又好似有個話題一齊傾。」

姜濤粉絲在演唱會開場前大合照。黎卓欣攝

後援會管理員見證MIRROR由被笑「扮韓仔」到彈起

呂爵安(Edan Lui)粉絲後援會的管理員May,在演唱會開始前6小時已抵達九展,準備派發應援物資。染著一頭金髮的May,戴著Viu TV招牌公仔「生啤」圖案口罩,眼睛塗上薄薄一層閃粉紅色的眼影。她笑指,這款眼影是因為上月有Edan代言才買的,事前並無對品牌有太大好感:「無買過架,佢代言咪買!都係百幾蚊,當支持吓。」她說,每次買代言產品,也是純粹出於對偶像的支持,產品本身的質素反而變得次要。

24歲的May於新聞系畢業,現時兼職文職工作。她憶述兩年多前剛加入粉絲後援會,會內成員只有廿人,現在已有超過七千人。當時仍是大學生的她,曾多次通宵「瞓街」,在活動場地外等待偶像出現,可幸的是遇上不少投契的知音人,其中一位就是陪她到現場派紀念品的「音符」。

兩人因追星而結緣,這兩晚更索性在九展附近訂酒店,方便存放紀念品,也方便出入。「我哋當係倉咁擺住啲嘢,尋晚臨瞓仲話要敷個mask先,要用最佳嘅狀態見Edan!」問May與追星友的感情,是否比讀書時認識的好友更要好? 在旁的音符不禁打趣說:「佢都無朋友嘅!」May淺笑說:「我話想去邊度排隊、甚至瞓街,音符都會陪我。」

May(左)是呂爵安(Edan Lui)粉絲後援會的管理員。黎卓欣攝

現在要兼顧工作和管理粉絲後援會,May深感吃力,但她卻說從無想過放棄管理員的工作,反而寧願「唔返工都要追星」:「我而家直情想唔返工,淨係搞fans club!不過唔返工又無錢搞。」

May目前為止至少花費5、6萬元在偶像身上,平日除了買代言產品,她也會買周邊商品、自資製作紀念品、買船飛到澳門應援,甚至特意買新相機以便拍攝偶像最好一面。今次演唱會,MAY豪擲數千元買足六場,又請假幫忙派發紀念品。只要事後收到Edan回覆,即使只是一句「辛苦晒」,也讓她甜在心頭,覺得一切都是值得。

曾是忠實韓迷

Edan並非May第一個追的明星,May曾是忠實韓迷,甚至會直接飛到韓國追星,那時她對本地樂壇幾乎毫無興趣,只是朋友偶爾分享才會聽到某幾首熱門廣東歌。不過在《全民造星》開播後,有人說某參賽者(現時ERROR成員「肥仔」)樣貌酷似Super Junior的成員,她便開始留意,後來更集集追看。在MIRROR成軍後,她更化身推銷員,慫恿身邊的親友關注:「媽咪都畀我荼毒咗!」

Edan粉絲設計的相片集。黎卓欣攝

她坦言MIRROR最近討論度大增,港人對本地新人包容度有所提升,或多或少也是受社會運動及疫情影響:「本土意識強咗,大家想有返廣東歌,想多啲人留意香港樂壇,會好proud of自己聽呢啲歌。但以前啲人會笑佢哋MK仔扮韓仔,又唔識跳舞、唔識唱歌,關注嘅就只有圍內粉絲,無咩好似依家咁多街外人留意。同埋加上以前有得去韓國,而家都無得飛,大家留返喺到追星。」

她又說,追港星比追韓星更有滿足感,因為至少沒有溝通問題,能近距離接觸,對方甚至會認得她。「有次我上咗節目,連我阿媽都認唔到我!但Edan竟然事後同我講佢認得出係我!」May興奮地說。

由造星100強,到單飛歌曲成為各大音樂串流平台的長期榜首,May可說是見證著偶像逐步成長,她笑說自己「老懷安慰」:「其實喺呢個粉絲圈耐咗,唔知佢喺出面,嘩!原來已經紅到咁。」她希望會有更多港人願意踏出第一步,先理解偶像的作品才作批評:「我會send Edan啲作品同佢哋理論,你哋真係聽咗先再講。希望大家唔好淨係focus韓國、甚至大陸嘅綜藝,會留意返原來喺香港,仲有班仔係咁努力。」

May笑言自己追星很專一長情,即使是十年後,相信只要Edan仍在演藝界打滾,她仍會做他的狂熱粉絲。

靚媽:上一個著迷的明星是鄭伊健 

燙著一頭捲髮的張太,帶同小四的兒子到場,她們買的是VIP飛(按:$1280一張),可以早於下午四時便入場看半小時綵排。兒子談起偶像有些害羞,小聲道:「最鐘意係Tiger,因為跳舞好好睇。」媽媽則口味不同:「最鐘意係Ian同姜濤!Ian唱歌好聽,姜濤就cute囉!好似媽媽睇住仔仔咁!」

化著淡妝、身穿白襯衫的張太,現在30多歲,育有一子一女,講到上一個令她如此瘋狂的偶像,不禁掩面大笑:「對上一個已經係中學嗰時鍾意鄭伊健,小學鍾意黎明!慘嘞,係咪暴露年齡?」她笑指,自己並不是狂迷,追車捕星未試過,頂多排隊看演唱會、花錢買唱片。

不少粉絲提早到達拍照。黎卓欣攝

在愛上MIRROR之前,張太最愛煲韓劇,坦言有好一段時間無如此為本地藝人著迷:「有聽但唔會話超級好鍾意,可能嗰陣覺得自己年紀大咗。但喺《全民造星》見到MIRROR呢班人好努力,有時都真係好感動。你諗吓本身參賽嗰時,佢哋只係業餘新人,但整出嚟嘅program都好好睇。」

MIRROR的出現,打開了一個缺口,讓她漸漸對本地電視節目多了興趣,也不時留意香港的新人,林家謙、劉俊謙、per se ... 這些受年輕人歡迎的名字,她琅琅上口。不過,張太認為自己較喜愛MIRROR,很大原因是能與孩子拉近距離:「其實係佢(兒子)同佢家姐睇開《全民造星》話好睇,咁我諗住同佢哋傾吓偈,就試吓睇,點知又真係幾好睇喎!佢哋都鍾意嘅時候,大家又好似有個話題一齊傾,咁又一齊去(活動)囉。」

40歲爸爸為小六女兒排紀念品:時代係轉變緊

在紀念品攤位的人龍外,三位穿著西裝的「中佬」正在探頭探腦,又有點尷尬地按著電話。40多歲的劉先生在九展工作,笑說自己是被小六的女兒「點落嚟買紀念品」,不過見到已大排長龍,便決定返回辦公室。

他說,太太和女兒年齡相距約30年,但因為MIRROR而打開了話匣子。「我太太都鍾意睇,佢哋粉絲嘅年齡層都幾闊,40幾歲嘅fans又有、小學生都有。」

紀念品商店大排長龍。黎卓欣攝

劉先生認為時移世易,喜見樂壇有新氣象,理應支持:「難得有個後生嘅偶像出到嚟,又受歡迎,我覺得都有實力嘅,應該要支持吓...TVB依家捧嗰啲都唔入流喇,嗰啲咩『星夢』嗰啲,我覺得表現都好掹車邊。雖然(MIRROR)呢啲係有少少化妝,打扮比較中性,但我40幾歲都可以接受。時代係轉變緊,無論韓國定其他地方都行緊呢啲路線,做咩香港仲要行緊80年代嘅風格呢?」他又大讚MIRROR 12子無論外觀、唱歌、跳舞或擺姿勢,都能與韓星睇齊




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe