眾新聞 Logo
眾新聞 CitizenNews
眾聞

網路創作歌手晴天林:冀作品為港人苦中作樂 保持心境開朗一齊捱落去


國安法實施九個月,大家仍不斷揣測紅線邊界,香港的文化、藝術尺度與創作自由成藝文界憂慮。曾被香港填詞人林夕點名稱讚的網絡唱作人晴天林,至今在Youtube創作了過百首作品,內容不少是諷刺時弊,批判權貴,因而深受年輕人喜愛。他坦言,國安法的任意、抽象、恐懼令創作者有如踩鋼線,箝制創作自由,更出現自我審查,並成為他創作時最大的掣肘,「雖然空間越嚟越細,但我希望我嘅作品仍可為香港人苦中作樂,因為抗爭嘅路來日方長,呢一刻最重要都係,保持心境開朗,大家一齊捱落去。」。 

 

 

晴天林是八十後,今年34歲,原從事市場營銷的他,2014年經歷雨傘運動後,觸發創作歌曲想法,希望透過音樂和歌詞來表達香港人對追求民主自由、守護香港的共同心聲,所以他開始上載自彈自唱的原創歌曲及二創歌曲影片到Youtube頻道,內容大多是諷刺時弊,例如揶揄水貨客的《今日香港》、講述雨傘運動後壁壘分明的社會現象《左右黃藍綠》等,令人開始認識晴天林。

《香港之歌 Medley》旅途中為香港人打氣

「其實一早已經開咗自己嘅Youtube channel,以前就主要放一些原創歌,只當興趣兼顧咁做。當時嘅諗法就係打一份工,有錢就可以做自己鍾意做嘅嘢,所以六、七年前都有唱一啲自己創作或者改篇嘅歌放上Youtube,主要係諷刺時弊,例如講打風、講水貨客嗰啲都有,但當時仍未全職去做。」

晴天林指自己在2019年辭職,碰巧辭職後幾個月,爆發反送中運動。2019年香港開始發生林林總總的事情,晴天林指自己有太多的感情想抒發,所以就用二創改歌詞的方式創作更多諷刺時弊歌曲,「6月9號,100萬人遊行,當時我咁啱去緊旅行,但我睇返好多新聞片段,見到當日嘅畫面都覺得好感動,所以就構思咗一首幫香港人打氣嘅歌,首歌叫《香港之歌 Medley》。但其實嗰首並唔係二創歌嚟,嗰首係串燒歌,串埋咗好多首流行歌,幫香港人打氣。」結果這首歌受到網民熱烈追捧,成為反送中其中一首膾炙人口的金曲,Youtube上的點擊率更過百萬。

《連儂牆》二創由這單新聞開始

「我最記得有一單新聞就係,大埔連儂牆有一個阿伯去斬啲小朋友,啲小朋友只係貼連儂牆,就俾人咁樣暴力對待,嗰件事我都好大感覺,之後我好快就寫咗一首,叫《連儂牆》嘅二創歌,算係比較早期觸發到我嘅一首歌。」他所創作的題材及意念均來自香港瞬變的局勢,因他認為香港實在有太多議題及爭議,令他萌生很多創作靈感,他又笑說「如果呢個社會係好太平嘅話,其實我都無咩可以寫得出。」

晴天林認為音樂具有很龐大的力量,其傳播力、穿透力及感染力都能夠震撼人的心靈,「就好似《願榮光歸香港》呢首歌,乘載住好多香港人嘅回憶同埋感動係入面,而且音樂係能夠令人不斷地去loop,即係一單新聞你唔會不斷咁翻睇,但係音樂就會不其然地係咁聽、係咁loop,因聽歌可抒發到自己嘅情感。」  

國安法實施後,白色恐怖籠罩着整個香港,而晴天林亦因此在創作上多了制肋,甚至出現自我審查的情況,「有啲說話可能唔可以直接講,要用代號代替,會修飾,甚至有一啲作品我寫完,覺得會出事嘅,直頭無出過街(面世)。」他認為現時國安法沒有界線,令創作者有如踩鋼線般,箝制創作自由,「我寫咗啲嘢,我只知道自己可能有事或者可能無事,無一個Rules俾我去跟,所以係創作方面會有好大嘅掣肘,其實對於喜愛創作嘅人嚟講,呢件事都真係幾困擾。」。

《願榮光歸香港》音樂令人不斷loop不斷聽 

晴天林又笑言覺得自己好快會無得再唱他的二創歌曲,甚至認為他的Youtube頻道很快便會被人鏟除,「你見《頭條新聞》都係咁啦,突然之間俾人打壓就無㗎喇,所以遲早有人嚟鏟走我個Youtube都唔出奇,所以我而家嘅心態就係,可以唱就繼續唱,因為真係今日唔知聽日事。」

晴天林形容自己的作品較為貼地,題材大多來自香港時事新聞大小事,例如《陳茂波不夠愛我》就是控訴財政預算案對市民的不公,歌詞中「陳茂波不夠愛我,連累個市亦下墮,連5000蚊亦需分期,電子券搞邊科」亦道出部分市民的心聲;而最新的創作《棉棉》則是改編自陳奕迅的《綿綿》,內容為諷刺陳奕迅撐新疆棉與Adidas割席:

「微博裡很多會折的腰,換到了的鈔票,血染抹不掉,誰維護過香港人權,其實新疆很遠,民族被勞役過,你醫神默許不得了」

晴天林指自己是一個苦中作樂的人,因為他認為生活上的荒謬未必能改變得到,但如何去過活,就是自己可以改變到。   周滿鏗攝


我會形容自己係一個苦中作樂嘅人,我經常覺得自己好唔開心,就會搵一個渠道去抒發自己嘅感受,個人嘅感覺都會好啲,呢種就係我所講嘅苦中作樂。


他希望苦中作樂的心態能傳遞給所有香港人,因為這種心態正正就是現時的香港人最需要的,「因為嗰種苦並唔係你能夠改變到,係政府搞咗好多事出嚟,令到你不開心,嗰種苦係你一時三刻都改變唔到嘅事。但係你用咩心態去看待呢件事,或者你如何去過你自己嘅生活,就是你自己可以改變到嘅嘢。」

他建議香港人若果真的感到很難受,心情消極鬱悶,可以嘗試間中不看新聞,或者讓自己放一個假期,盡情休息,這也是一種苦中作樂的方法,可以放鬆下自己,不要經常懷着一種好絕望、好灰的心情。

晴天林亦慨嘆,特別在47名民主派被捕後,白色恐怖的感覺更加強烈,「感覺就係原來唔係做太多嘢,都會被國安法拉,好似國安法呢樣嘢,佢哋話係就係,覺得你顛覆國家,你就係顛覆國家,佢哋想點演繹都得咁。」。晴天林認為現時香港人的民主自由被打壓的程度是非常誇張,由國安法,直到最近修改選舉制度一事,已經可以反映得出香港的民主制度其實是倒退得難以想像,所以他對於現屆政府唯一的評價就是,「垃圾」。

 

去年10月,林夕曾在Facebook公開點名稱讚晴天林的創作及歌聲,更邀請他代唱一首原來寫給已故巨星張國榮的歌曲。    林夕Facebook截圖

保持心境開朗,大家一齊捱落去!

曾被「詞神」林夕點名的他透露其全職Youtuber的工作,原來並不能維持到他的生活所需,因他主要是創作二創歌曲,而二創歌牽涉版權問題,所以他的Youtube廣告費較其他Youtuber低,所以要靠開班教琴、幫人編曲等副業保持一定收入。

雖則如此,但當記者問到晴天林有無意欲向主流樂壇發展時,他卻斬釘截鐵地拒絕,「係如今呢個世代,主流定唔主流,已經無咩分別啦。」他指出,自己現時唱很多諷刺時下歌手的歌,相信主流的唱片公司一定不會喜歡他,所以他亦不會計劃這件事

而家同以前唔同㗎喇,好大分別,網絡嘅威力好犀利。我有啲作品嘅點擊突然之間都會好高,仲高過某啲主流歌手。我覺得如果有好作品,就一定會有人聽,所以專心做好自己嘅創作就足夠。

晴天林除了喜歡諷刺時弊,批判權貴外,亦愛扮鬼扮馬,惡搞時下藝人及歌手。   晴天林Facebook截圖

晴天林坦言香港的自由、空間被收窄得越來越狹窄,但他希望香港人可以自強不息,同時冀昐自己的作品可以為香港人苦中作樂,最後他寄語香港人:

雖然香港現時嘅環境係被打壓得好勁,甚至令到身邊好多人移民。但我覺得就算處於呢個逆境當中,最緊要就係整理好自己嘅心情,唔好成日令到自己處於絕望嘅心情裡面,因為我覺得抗爭嘅路來日方長,呢一刻最重要嘅都係保持心境開朗,大家一齊捱落去!  




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe