眾新聞 Logo
眾新聞 CitizenNews
眾說

千奇百趣投訴篇之一


【撰文:註冊園境師園思】

藉這次機會向大家講一些入行以來的有趣投訴個案,帶出政策/行政上一些古怪思維,以及一些坊間迷思。由於園境師行頭很窄(按:全港只有200多位註冊園境師),為免不想被秋後算帳,所有項目不會公開名稱及地點。 

各類投訴排名榜三甲分别係: 

1) 蚊蟲鼠患問題!

2) 點解要斬樹?

3) 點解公園有咁多花池但總欠缺可用活動空間? 

今次先講蚊蟲投訴,因私心想幫園境界平反一些坊間迷思。

市民最常投訴的是屋苑的蚊蟲鼠患問題。

個案一:某年連續暴雨後某屋邨某一個花池出現百足蟲類。

屋苑管理:喂,阿LA(Landscape Architect簡稱),啲蟲爬晒出嚟,嚇襯住客,同埋都唔知有冇毒㗎? 

我:你俾相我睇吓先,我再搵同事同園藝判頭落去望下啦。 

同事及判頭回覆話大雨後啲百足蟲已經走晒,反而係有少少蚯蚓。另外屋邨管理傳過來的相只係兩三條冇違反限聚令嘅百足蟲,並唔係你口中所謂嘅百足蟲群組囉。 

我:Well,咁嘅,其實因為過去幾日實在太大雨,小昆蟲喺泥土入面可能唔夠氧氣,會爬出來抖下氣。當雨水一退,啲蟲就會爬返落去泥土度。加上我同事現埸睇過,都冇事發生喎。 

屋邨管理:我唔理!啲居民投訴到好煩,總之你要幫我做啲嘢搞掂佢! 

我:吓?冇嘢可以做喎,殺蟲水都唔可以亂噴㗎,其實殺蟲水有一定毒性,噴落啲植物度有機會沖衝落啲泥土,繼而流落排水系統。況且植物無蟲害,噴殺蟲水係會影響植物生長㗎,等於你好人好姐我喪噴你消毒藥水一樣。

屋邨管理仍然堅持要求我噴殺蟲水,而我選擇聽取民意,俾佢最後成功爭取到,搵咗一個遠離居民嘅花池,叫判頭係咁意輕輕噴咗少少稀釋殺蟲水,滿意收工。

如果植物無蟲害,噴殺蟲水會影響植物生長。本圖為資料照片,與上述個案無關。

個案二:發生於10年前某高調大花筒部門位於近郊區的新落成總部。 

大花筒部門:喂,我哋同事去樓下花園散步時好似見到有毛蟲類的生物爬爬下,巧驚呀!(按:該大片花園草地是屬於該部門的空間,外人不得內進。) 

狂翻白眼中的我:其實有毛蟲係好事呀,之後就會變做蝴蝶可以俾你玩撲蝶。我哋唔會幫你滅蟲㗎。。。(其實毛蟲變蝴蝶應係小學雞知識)

公園看到毛蟲可以是好事!圖片來源:gardeningknowhow.com

個案三:又係毛蟲,呢個係我從同行口中聽返來,我唔記得係尊貴區議員問,定係地區人士在公眾諮詢(public consultation)發問。 

問:我想喺屋邨見到蝴蝶,但係唔想見到毛蟲,可以點搞? 

同行:其實有毛蟲先有蝴蝶㗎喎…… 

個案四至一千:蚊患/鼠患 

園思想講蚊患/鼠患係同環境整潔及積水關係最大!明明落去睇場嘅時候,未種嘢時已經有鼠患,點解一定要怪植物花池係鼠窩呢?一日管理公司唔清理垃圾同渠,一日都冇辦法徹底解决。其實大家都見過喺花池入面有各種千奇百趣垃圾。如果係近商場的話,仲有好多食物殘渣同飯盒。有好多屋苑同屋邨都連著一些斜坡,本身斜坡已經容易有積水同垃圾,加上如果斜坡唔屬於屋邨範圍,咁我相信各部門只會帶你遊花園直至天荒地老。

定期清理垃圾和積水有效防蚊蟲。

當然有人會提議種一些驅蚊植物,但其實效果係冇你想像咁明顯。因為喺公共空間空氣流通,香味會散得好快唔够濃,到真係大量種到夠濃嘅時候,你地又會投訴好大陣味見頭暈。屋邨嘅綠化空間已經唔係多仲要好分散。所以效果其實好弱,喺自己屋企種效果會好好多。處理蚊患,噴蚊油、安裝滅蚊燈及定期清理積水先係最有效。至於鼠患,我哋會根據食環署要求,種疏啲(即見泥面)及俗稱 「光腳」嘅灌木(即見灌木根至最底層葉的莖)。當然,呢樣做法會引伸另一樣投訴…… 

阿LA,典解你種嘢種到見晒泥,植物下面又無葉,好肉酸呀!(暈……) 

作者簡介:園思,香港註冊園境師(Registrated Landscape Architect)。入行十多年,近年工作上要兼顧公關解答各類關於園境投訴及協調工作(誰想做。。。)


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe