眾新聞 Logo
眾新聞 CitizenNews
眾聞

【學校復課 】中學校長專訪:準考生壓力大喊出嚟 老師情緒困擾要疏導


農曆新年假期完結,學校可安排不多於全校三分之一的學生回校上課半日。要全校恢復半日面授課,則需全校教職員做定期檢測。天水圍有中學今日安排中五及中六學生復課,校長梁國豪說,可以復課對學生而言固然是開心事,孩子不用再日日待在家中,對家長來說其實也是「抖啖氣、歇一歇」的機會。實體課斷斷續續停了一年有多,梁國豪坦言,課程進度「要趕一定趕到,但效率又係另一回事」,故將以補課形式為同學補底,他又形容如何將沉迷於電子世界中的學生拉回現實,鼓勵人際溝通,將是學校的新挑戰。「始終唔淨係學業,多元發展都好重要。」課外活動仍需暫停,學校計劃將魔術、科學等元素融入日常課堂,冀助學生在疫境下全能發展。

 「佢哋(同學)緊係開心喇,咁耐無返!」香港中文大學校友會聯會張煊昌中學校長梁國豪笑說,停課了一段日子,同學今日返到學校,看上去比以前更精神。教育局規定,若全校教職員不做定期檢測,學校只可安排不多於全校三分之一的學生回校上課半日,梁國豪認為高年級學生課業較緊迫,須盡早備戰文憑試,故先安排中五中六學生回校,中一至四學生則輪流於下午回校兩小時對卷。

「希望畀佢哋有機會返吓嚟,見吓同學,唔洗日日喺屋企,唯一嘅活動就係打機同打機。」本已是低頭族的青少年,疫情下社交、課外活動中斷,連上課也移師網上,「喺屋企打咗成年機,點拉翻佢哋出嚟呢?」。

中學生今日復課。黎卓欣攝

理科出身的梁國豪,書架堆滿科學書籍,案頭放了一部機械人。本在中大讀理學,梁笑說自己是「中途出家」,跑去攻讀教育碩士,早年曾任一所中學副校長,去年接任張煊昌中學校長一職。上任半年,梁國豪坦言空降學校,對校園既有文化仍需理解,然而持續一年的疫情,使這位新任校長工作更艱鉅,「好彩老師都好緊張學生,唔介意付出多啲時間」。

實體課暫停一年有多,梁國豪說,課程進度「要趕一定趕到,但效率又係另一回事。」他形容,網上教學期間老師都各施各法,希望能保持教學質素:「有啲要求網課期間做quiz即時交,叫做mon住小朋友學習嘅進度,你話會唔會去到好似現實上堂咁呢,我都唔敢肯定得,啱啱先考完試,都要睇翻啲統計數據。」復課後,學校會評估考試成績,再安排課後網上補習班,讓同學追回落後的進度。

不過,中六同學需應對的,不止校內的常規測考,而是決定升學去向的文憑試。

中六同學好大壓力,12月嘅時候聽到要停課,佢哋喊㗎,因為好擔心會唔會12月停課前,就係佢哋最後一日上堂呢,佢哋會擔心個公開試會點呢。其實佢哋好需要老師陪住佢哋去成長,好想有實體課堂。

梁國豪說著說著摘下眼鏡,坦言心情矛盾:「個感覺好深刻,當你望住啲小朋友係度喊,咁但係...無奈個疫情又真係無辦法。」幸好最後趕及在公開試前復課,中六學生的學習休假,會由2月26日延至3月19日才開始。

校長梁國豪坦言,理解中六生的心情,但無奈要停課,使他心情矛盾。黎卓欣攝

既然實體課是師生所渴望的,為何不全校老師接受檢測,全面恢復面授課堂?梁稱,在執行上有困難,老師要每兩星期自行做檢測,但同時各社區檢測中心又要應對餐飲等行業的需求,擔心檢測中心會不勝負荷。有老師反映,「一村人喺度排隊,唔敢行埋去」,怕有感染風險。加上家長亦表示「無謂令到學校同老師有對立面,不如唔好搞(全校復課)啦」,最終梁決定只恢復三分之一學生復課。

融合課外元素與常規課堂 

疫情下課外活動一度暫停,同學已有一段長時間未有接觸學業以外的知識。學校於是安排初中生在家上「STEM堂」,將迷你電腦主機板寄到同學家中,隔著熒幕逐步學習組裝機械人。他又構思將英文與魔術結合,讓同學把握學習的黃金時期,全面發展個人潛能。

學校安排初中生在家上「STEM堂」,將迷你電腦主機板寄到同學家中。黎卓欣攝

對中學生而言,同窗之間的相處亦是校園生活不可或缺的部分。陸運會、旅行日相繼取消,同學唯盼著能拍攝畢業班相。梁國豪說,暫時打算安排攝影公司分三天來拍攝,成本相對較高,但仍希望為同學留下珍貴的回憶。

教學模式交替 老師壓力倍增

復課與否,並非紙上談兵,背後牽及整間學校硬件軟件的資源調配,如何分配人力物力,盡量讓每級學生都有機會回校上課,兼顧同學利益及老師的工作量,是學校管理層必須解決的難題。

我最擔心老師嘅情緒問題,(轉教學模式)老師都要時間適應......就算老師都會有好大情緒困擾。

梁早前安排同事上「正向思維」工作坊,望能幫助他們保持心理健康。「老師都要有正面嘅心理狀況,先可以幫助學生感受到陽光,希望慢慢一步一步嚟喇」。

訪問中梁校長多次說,「係好困難,學校唯有盡量做」。社會、疫情情況仍未明朗,面對未知的挑戰,這位新上任的「空降校長」唯有承諾:盡力做、盡量做。




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe