眾新聞 Logo
眾新聞 CitizenNews
眾聞

食肆周四恢復晚市堂食 須要求顧客用「安心出行」或留資料 有餐廳批評指引不清晰


政府宣布食肆後日(18日)起可恢復晚市堂食至10時,限4人一枱,負責人必須要求顧客進入食肆前,利用「安心出行」流動應用程式記錄行蹤,或登記顧客的個人資料,包括姓名、電話及到訪時間,並保留有關紀錄31日。違者會被處罰縮短堂食時間,至下午5時59分及2人一枱,為期3、7或14日。

有餐廳表示明白客人對記錄電子足跡的擔憂,但只做外賣生意未能維持營運,將提供紙筆登記資料。

位於銅鑼灣的西餐廳Around Wellington,負責人Jonathan批評政府指引不清晰,「仲未好理解到今次公佈嘅消息,要啲時間消化」,現在餐廳只能「估估吓」,或借鏡其他行家做法:「作為餐廳負責人,其實都唔知政府想點。當登記資料咁計,佢有冇一套好清晰嘅指引,究竟係以咩嘅form去登記呢?定總之有感染個案,我哋提供到邊啲客嚟過、幾時嚟過就得呢?」

Jonathan坦言,晚市是餐廳主要的收入來源,外賣生意未見理想,只能勉強維持營運,但同時亦明白客人對網上登記個人資料有所顧慮,擔心會曝露電子足跡,故會提供紙筆供客人寫下姓名及電話,資料在31天後會銷毀。「唔覺得『安心出行』係有用嘅措施,如果只係喺電話儲存資料,咁點解個程式要攞咁多權限?政府始終畀唔到信心市民去用。」他又說,擔心登記資料程序會影響午市生意:「大家都係得個幾鐘食晏,如果花太多時間做登記,咁啲客又要等好耐,呢樣嘢係唔make sense。」

至於安排員工進行病毒檢測方面,Jonathan說有員工反映網上預約已爆滿、到現場排隊輪候亦不果,直至現在仍未能成功完成檢測。「檢測資源非常有限,根本無可能應付各行各業,政府仲要求每隔14日就要做一次,即係每隔14日就有咁多人流去檢測,根本就唔make sense。」

元朗亞玉冰室的負責人黎先生則表示,自去年12月政府限2人一枱、停晚市堂食後,餐廳在兩個月內虧損6位數字,「每日都蝕錢,如果繼續係咁,我諗都頂唔到幾耐」,故平衡員工收入及公司營運後,無奈只能跟隨政府政策。餐廳會提供紙筆,讓客人寫下姓名及電話,放進收集箱,資料保存31日後會銷毀。另外又設Google Form供客人填寫資料,數據同樣保存31日銷毀。

餐廳提供紙筆,讓客人寫下姓名及電話,放進收集箱。受訪者提供

他批評政府未有站於業界角度制訂政策:「一班高官,喺行政會議開會,有冇業界真正嘅聲音喺入面呢?飲食界嘅代表張宇人,又係咪真係走訪過我哋嘅舖頭呢?」




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe