眾新聞 Logo
眾新聞 CitizenNews
眾說

林鄭月娥曬你冷


林鄭月娥任期只剩下一年半,當香港武漢肺炎疫情尚未控制好的時候,鍾意搞政治多個搞民生嘅林鄭月娥決定曬你冷,一炮過攬炒香港,推出五大立法工作。其中三個抽擊香港核心價值,真係想幫佢配返句對白,香港人,你今次仲唔死?!

林鄭月娥周四出席立法會答問大會。香港電台影片截圖

第一個立法工作,就係確立公職人員宣誓制度,當中包括區議員。係人都知相關計劃係因為唔輸得嘅林鄭月娥,前年導致建制派喺區議會慘敗,所以決定推出相關計劃,逼死區議會主流民意。如果你唔宣誓,你就會喪失區議員資格。如果你宣誓,只要瘋狂嘅政府搵到你其中一個社交媒體寫過違反誓詞嘅貼文,你就係犯法。簡單嚟講,橫又死掂又死。林鄭月娥就係要逼死你,因為忠誠反對派將會交由現時嘅建制派去擔任,至於立法會執政黨當然係紫荊黨啦!

第二個立法工作就係立法引入非本地培訓醫生。你估最後會有乜嘢人願意透過呢個計劃去香港執業呢?而家透過BNO五加一計劃移民隨時連香港人身份都冇埋,嗰班外國畢業外國工作嘅香港永久居民,來咗香港之後隨時連最寶貴嘅外國護照都冇埋,正正式式成為大灣區人。唔好傻啦,國安法令國家咁安全,嗰班貪生怕死嘅醫護人員都係留返喺可恥嘅歐美國家,勾結外國勢力就好了。邊有人咁蠢喺香港風頭火勢嘅時候走返嚟,唔通真係貪有國安法咩!大家又係時候準備好紅包畀將會服務香港人嘅內地醫護人員啦!

第三個立法建議就係立法打擊虛假訊息、侵犯個人私隱、擾亂社會秩序行為。呢個行為你估真係針對梁振英咩?好明顯就係要盡全力限制新聞自由。當日香港電台就係透過查冊制度,搵到721事件關鍵人物。你估以後大家仲可唔可以透過查冊搵到事實真相?唔使諗,邊個走去網上起底就即時犯法,除非你係梁振英。從此以後,大家日日只會見到一式一樣嘅愛國愛港新聞,所謂嘅深入報導,除非係針對民主派人士,否則一律犯法,唔係違反最新準備立嘅法,就肯定係違反國安法。

去到最後,林鄭月娥表示:「你可以繼續罵官員,包括我本人,但起碼讓我們做事。有一個大致上回復正常的立法會,我們就會不斷提出這些大膽但有益社會的建議,今日五項立法工作,老實說如果是去年那樣的立法會,起碼有兩三項不敢提出,打撃網上甚麼,宣誓有法律後果,可能會議都開不成。」一句到尾,呢啲唔係叫做官到無求膽自大,係叫做無恥、睬你都有味、獨攬大權。從此以後你有你鬧,佢有佢漠視民意,繼續攬炒香港。所謂嘅如果主流民意不接受自己就會落台,已經成為最大嘅大話。喺未來18個月,林鄭月娥版嘅濫炒十部曲將會加速推行,全香港各行各業一定會受影響,大家又準備好未呢?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe