眾新聞 Logo
眾新聞 CitizenNews
眾說

逃出可恥但有用


唔好意思,再次借用出名電影名稱作為文章標題,今次想講嘅內容就係流亡海外。許智峯因為政治打壓流亡海外,結果人人得而誅之。林鄭月娥、鄧炳強、還有林志偉齊齊譴責,林鄭月娥表示許智峯沒有公信力,更表示相不相信許智峯言論要想想這個人有什麼前科。林志偉就在警察隊員佐級協會主席隨筆表示有人美化自己逃避刑責的行為,吹噓自己為政治而流亡,是拒絕承擔責任的懦夫。許智峯一走,你一腳我一腳踩個不亦樂乎。原來流亡海外在他們眼中罪無可恕。如果係咁,點解香港警方到今時今日仲未譴責呢兩位人士呢?

西瓜佬陳志祥。《蘋果日報》照片

第一個就係 721事件其中一位主角,小牛農莊經營者陳志祥。當日陳志祥在元朗站襲擊立場姐姐何桂藍證據確鑿。根據網上資料,陳志祥更有黑幫背景。之後有消息指陳志祥已經潛逃海外,經營的農莊也沒有人應門。鄧炳強、林鄭月娥、林志偉,唔知你點樣睇陳志祥流亡海外事件呢?陳志祥離開香港已經有多個月,而且陳志祥在香港犯下嚴重刑事罪,點解到今時今日唔見你哋班正義L強烈譴責陳志祥係懦夫,逃避刑責走佬到海外?唔通黑社會出走海外合情合理合法,所以香港警察選擇性執法,到今時今日各位上述人士都繼續採取鴕鳥政策?

另一位走佬到海外的人士就係上海仔。即使兩度棄保潛逃,中間離開香港一大段時間,但係香港警方對待這名人士態度非常友善,不但多年來未有嚴厲譴責,上海仔回到香港後竟然可以獲得保釋,然後在五星級酒店進行隔離。到目前為止律政司仍然未提出起訴。許智峯到目前為止只是潛逃過一次,而且罪行比起以上兩人輕微得多,但係建制派警方和特區政府上上下下就非常緊張;西瓜佬和上海仔做同一樣的事,他們就選擇低調處理,點解嘅?點解嘅? 

上海仔。《蘋果日報》資料照片

正所謂逃出可恥但有用,如果你係黑勢力。如果你係正義嘅立法會議員,就會畀人鬧逃出可恥你冇用。係呀,香港就係咁瘋狂。鬼叫你讀得成書攞到法律學士咩!早知今日,何必當初。如果當日讀唔成書,走去讀毅進課程,甚至係加入黑勢力,走佬咪走囉,你吹得我脹呀!去到外國夜夜笙歌,一哥粒聲都唔出;返到嚟香港住五星級酒店,林志偉話我睇唔到;放棄自己嘅農莊,林鄭月娥分分鐘送你一個大紫荊勳章,讚你保家衛族添。係咪好瘋狂呢?


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe