眾新聞 Logo
眾新聞 CitizenNews
眾說

用簡樸生活攞回跟隨基督的自由


【撰文:春麗】

柏堅喺上星期榮光崇拜嘅講道帶出一個好有思考性嘅重點:用簡樸生活攞回跟隨基督的自由,星期五晚聽完,諗到今日(8日)。

活在威權時代的香港,面對邪惡政權要繼續向前行,我哋應該要好好調整下生活,以下是反思完可以行出的12個一小步建議:

1. 簡樸團契生活

保持2-3個交心有感動有質素的小組團契,搵一兩間幫助您跟隨基督、活出所信的教會群體,可以是不同形式的教會,可以是不同特質的團契。

唔好比大教會大宗派綁住,大唔一定好,多人唔一定高質,simple is good;

2.簡樸健康生活

吃得清一點,平一點,但一樣可以營養豐富,好好味。每個人體質不一樣,可能可以用一兩個月時間去認識當下自己身體的情況,再作出飲食和休息的調整。

簡樸唔一定需要快,拒絕快餐,少去茶餐廳,simple but not fast;

簡樸生活,由今天開始。兩個番薯一隻雞蛋,自己lunch自己蒸,$7。

3. 簡樸讀書生活

選擇讀一些有用的書,整理一下自己的書櫃,一直影響你又對你有長遠幫助的書,可以多讀,其他可以轉贈給有需要的人。

讀書有益,唔一定為咗考試同學位,享受讀書的自由,接受知識與智慧的自由;

4. 簡樸信仰生活

整理一下知唔知自己一直相信怎麼,千祈唔好人講你又信,信得真誠一點,信得紮實一點,耶穌話,尋找必尋見,你唔搵,梗係乜都唔知啦。

二手嘅信仰係一種綑綁,綑綁咗你對真正信仰嘅尋求,上帝,好大好遼闊,但同時又好精緻;

5. 簡樸運動生活

集中一兩種幫助你又喜歡的運動,可以是激烈的武術,也可以是輕輕鬆鬆的呼拉圈,總之點都要郁吓,比自己筋骨保持係一個良好的運動狀態,最好體重慢慢回落5-10%,享受身體靈活輕盈的自由;

6. 簡樸義工生活

施比受更為有福,幫過人你就明白,唔需要不停博命透支咁樣去幫,量力而為,甘心樂意;

7. 簡樸媒體生活

這個年代,媒體已經是生活的一部份,不需要再被TVB支配,人人都是自媒體,資訊又爆炸,又唔可以俾佢控制住,但係又需要佢嘅存在。揀返5至10個你鍾意同對你有幫助的媒體,其他,可以唔使睇咁多。

面對媒體最自由的一種狀態係,睇又得唔睇又得,得咗。Truth is Simple;

8. 簡樸經濟生活

經濟越來越差都可能是一個事實,縮減開支,但又唔可以過度積蓄財富,盡量令到自己唔好有負債,需要時還可以有一點錢去幫助自己或幫助身邊的人,但點樣先係夠,可能要問返自己;

9. 簡樸靈修生活

每一日都要反思,都要明白上帝給我們的功課,靈修唔一定坐喺度讀聖經,靈修可以係一種生活態度,一種24×7也讓上帝和你說話的自省,清心加禱告,可能一個合適嘅環境同時段對你有特別的幫助;

10. 簡樸政治生活

政治可能係我哋生活嘅一部份,唔熱衷都至少有啲認識,簡簡單單知道個世界發生乜嘢事,點解個社會搞成咁,起碼祈禱都識得點祈,而唔係下下都只可以順服在上掌權者咁單調,上帝唔止係政治之中,上帝更加係在政治之上,而唔係政治嘅出面;

11. 簡樸社交生活

Online 又好,Offline也好,簡化你的社交網絡和人的素質,識人好過識字,識錯人就大件事。仲未計嗰啲神秘人、0.5或者有心攞着數的粉腸,吃素菜彼此相愛,強如吃肥牛彼此相恨,聖經對於交朋結友好有智慧;

12. 簡樸家庭生活

家庭最重要,簡簡單單,一家人齊齊整整,去長洲唔一定差過去歐洲,重建家庭關係,禱告求主幫助,家家有本難念的經,個一本一定唔係聖經,Love Is Simple....

要得到基督裏的真自由,重內省,重真誠,重犧牲,重基督,基督的愛已經釋放了我們,係真嘅。

共勉。


請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe