眾新聞 Logo
眾新聞 CitizenNews
眾聞

【引渡修例】醫學界陳沛然未表態 醫學會稱未有立場 選委組織學生聯署反對


 

政府建議修訂《逃犯條例》引起廣泛爭議,政界、商界、法律界、新聞界、社福界、教育界等紛紛表達憂慮,惟醫護界未見高調支持或反對。香港醫學會多名會董回應眾新聞查詢時稱,對修例未有立場。醫學會會董會成員、醫學界立法會議員陳沛然,連日來未有回覆記者查詢,未知他將投支持或反對票。

有醫護組織及選委陸續聯署反對修例。杏林覺醒成員黃任匡表示,《逃犯條例》修訂的議題已超政治派別,觸及香港根本的價值,他希望透過聯署,表示業界對陳沛然有所期望,「有冇進一步嘅嘢可以做到,向政府施壓、向行會施壓,甚至積極咁參與拉布等,而去達到實質嘅效果。」

醫學界立法會議員陳沛然(左),未公開表達對修例立場。眾新聞製圖

醫學會未有立場 會長:唔係一個政治團體

醫學會會長何仲平本周二接受眾新聞查詢時指,醫學會有逾萬名會員,眾人意見紛紜,學會目前未有收到會員對《逃犯條例》修訂的意見,由20多名醫生組成的會董會,亦未有討論修例事宜、未有立場。何表示,如果有會員提出意見,相關事項可以在會董會議上討論,否則學會不會主動展開討論,「第一,(個別醫生)已經有好多渠道表達呢樣嘢。第二,醫學會到底唔係一個政治團體。」

何仲平解釋,醫學會已經很忙碌,早前要應對放寬海外醫生考實習方案,目前又要處理民建聯及民主黨提出建議海外醫生可免試來港執業的私人條例草案,「呢啲(《逃犯條例》修訂)我哋都唔得閒理……如果你話下一次(會議),可能會提出嚟(討論),OK嘅,我哋完全冇問題,討論當然可以討論。」

腎科專科醫生何仲平去年接替蔡堅,出任香港醫學會會長。何仲平2016年未有競逐醫學界選委。《蘋果日報》圖片

西醫工會會長、醫學會會董楊超發,近年有參與內地相關工作,包括擔任廣東省粵港澳合作促進會醫藥衛生大健康委員會常務副主任,以及粵港澳大灣區醫師聯盟副主任。被問到有香港醫生到內地做義工、參與教學或研討工作,甚至提供醫療服務等,可有對今次修例有所關注。楊超發回應指,現時持有內地執業牌照的香港醫生僅50餘個,「醫生好少犯法,商人有機會(觸犯法例)啲啦。」

楊超發提到,擔心《逃犯條例》修訂令醫學界分裂,「我哋上一次、佔中嗰陣時,將醫學界分開咗兩半,一邊藍、一邊黃。今次再搞呢樣嘢,驚再撕裂啲,我哋都有少少擔心,四分五裂呢,變咗大家想合作、想解決問題咪仲難囉,我哋都唔想搞到影響到市民健康問題。」

楊超發表示,西醫工會及醫學會暫時都未有收到會員就《逃犯條例》修訂方面的查詢,兩會亦未有主動詢問會員的意見,「暫時(將《逃犯條例》修訂)擺到好低層次,因為我哋仲有嘢要搞,就係關於醫生人手短缺問題,我哋都搞到一頭煙。搞掂醫委會嗰單(放寬海外醫生考實習),而家兩個黨又搞嘢(民建聯及民主黨提出私人條例草案,建議海外醫生可免試來港執業),我哋都要應付呢啲嘢,都要同有關方面傾吓點樣處理人手短缺問題,冇時間搞呢個逃犯嗰啲。」

個別會董提議討論修例 「高度敏感訊息可牽涉公共衛生」

不過,另一名醫學會會董馮德焜則認為,《逃犯條例》修訂對香港影響深遠,亦令社會高度分化,醫學會宜作討論。他指出,當局就修例的諮詢時間短促,社會上包括法律界人士都有疑慮,而政府未能完全解答。在醫學界層面,他關注到,部份政府視為高度敏感的訊息,可能牽涉公共衛生。「如果醫生喺診症層面透露咗,會唔會危害國家安全呢?咁呢啲會間接令佢受國安嘅法例、俾《逃犯條例》控制到,所以呢樣嘢我都覺得要處理,我唔覺得完全唔關(醫學界)事,視乎政府對呢啲有幾敏感、點處理。沙士嗰陣都係咁,喺威爾斯度做嘅醫生,所發放嘅消息係同(時任衞生福利及食物局局長)楊永強相反㗎喎,我嗰時啱啱考緊畢業試,我記得佢碌大隻眼話(沙士)喺香港冇爆發,之後(威爾斯親王醫院)8A(病房)就爆晒出嚟,其實咪就係呢啲情況。」

馮德焜計劃提出在會董會議上討論修訂《逃犯條例》一事,預計在下一次、6月4日的會議上展開討論,「傾吓我哋有咩做到,例如會唔會提供一個平台俾政府多啲講解。」然而,他指《逃犯條例》修訂過於技術性,並非醫生專業範圍,相信醫學會對於修例的幫助不大,他預期醫學會不太可能對修例做立場上的宣示。

馮德焜提到,當局在2003年一度淡化沙士疫情。他關注部份政府視為高度敏感的訊息可牽涉公共衛生,在修例後,如醫生透露該些消息,或會被視作危害國家安全。《蘋果日報》圖片

何仲平、楊超發、馮德焜均稱,醫學會未有就修例事宜,與醫學界立法會議員陳沛然溝通。資料顯示,陳沛然是醫學會會董會其中一名成員。

政府2月中提出修例後,陳沛然在3月27日的立法會大會上,曾投票支持楊岳橋提出的「要求政府擱置設立中港移交逃犯安排」議案。立法會秘書處5月6日發通知,指內會通過由石禮謙取代涂謹申主持《逃犯條例》法案委員會會議後,陳未有參與民主派譴責秘書處的聯署,但有出席涂謹申6日及11日主持的兩次法案委員會會議,惟缺席14日的會議。上周五(24日)的內會會議,陳沛然並沒有就「不反對《逃犯條例》修訂草案直上大會恢復二讀」動議投票,卻有贊成區諾軒提出、「立法會先向台方查詢在何種狀況下才會引渡」的建議。眾新聞連日向陳沛然查詢其立場、投票意向及考慮因素等,未獲回覆。

馮德焜認為,陳沛然在議會保持中立、不站任何一邊是好事,對社會有利,「唔應該純粹係立場宣示,我哋要解決問題吖嘛,總要有人解決。Pierre(陳沛然)又好,或者成個(醫學)專業,都應該要站喺社會利益上面,幫社會拆解呢個問題……可唔可以搵個中間少少嘅方法解決件事,解除大家嘅憂慮之餘,亦令政府落到台。」

杏林覺醒:議題超政治派別,關乎香港根本價值

杏林覺醒成員、醫學界選委黃任匡表示,醫學界組織近期要應對多個議題,杏林覺醒亦未有投放太多精力及時間於《逃犯條例》修訂,「但係我哋都覺得呢樣嘢好緊要,唔係因為我哋係醫生而覺得嗰樣嘢緊要,而係作為一個公民、作為一個香港人,我哋覺得(《逃犯條例》修訂)緊要,應該要反對。」

黃任匡明言,他們「做緊嘢」,真普選醫生聯盟19名醫學界選委及杏林覺醒,將發聯署聲明,讓香港的西醫及牙醫參與聯署反對修例。他又指,希望可以聚集到業界朋友、同事了解及反對修例,例如鼓勵他們參與遊行及聯署。

黃任匡表示,一直有就修例事宜向陳沛然了解,稱陳沛然在修例初期已表明會投反對票,近兩、三個星期陳亦再向杏林覺醒確認立場不變,會反對修例。惟黃任匡形容,陳沛然似乎不是很積極反對修例,「無論喺個討論裡面,定有人期望佢參與(議會)『拉布』,或者做一啲業界民調,佢似乎都冇任何呢啲動作或者意向。我自己就希望佢可以積極啲,我都明白佢一路喺議會個取態係想做一個中立、中間派嘅議員,但我相信呢個議題已經超然於你究竟係咩派別嘅議員,呢個應該係好根本、好fundamental,(關乎)香港嘅identity或價值。如果通過咗,我哋會覺得,香港之所以為香港嘅嘢就冇咗。」

黃任匡期望藉醫學界聯署發聲,「希望可以俾到多啲動機佢(陳沛然),希望佢覺得業界喺呢件事係對佢有期望嘅。你叫期望又好,壓力又好啦,總之我哋係想佢再進一步做多啲嘢,唔係淨係㩒個制投反對票,因為而家喺立法會㩒個制投反對票,效果係零,點都會過。所以有冇進一步嘅嘢可以做到,向政府施壓、向行會施壓,甚至積極參與拉布等,而達到實質效果。」

在審議《逃犯條例》修訂法案委員會「鬧雙胞」後,陳沛然曾兩次出席涂謹申主持的會議,但未有出席最後一次、5月14日的會議。資料圖片

衞生服務界選委反修例 憂長遠影響公共衛生

衞生服務界29名選委日前聯署反對修訂《逃犯條例》。聲明提到,一旦草案落實執行,本港新聞工作者在採訪可能觸碰到北京神經的內地公共衛生議題,如傳染病及疫症爆發、食物食水安全、黑心疫苗等時,回港後可能被內地以各種名義的罪行要求引渡回內地受審,對本地傳媒帶來極大風險,可能造成「寒蟬效應」。聯署選委認為,修例除了妨礙在香港行使言論自由及新聞自由,長遠亦影響香港公共衛生及健康。

有份參與聯署的公立醫院護士劉凱文表示:「我哋講大陸嘅(公共衛生議題),例如大陸黑心疫苗、傳染病,呢啲如果我哋講,會唔會俾人話洩露國家機密呢?佢就唔會以洩露國家機密、尋釁滋事(罪名)嚟拉我哋,但可能用其他(罪名),最慘係羅織罪名,你估唔到㗎,呢個係最得人驚嘅地方。之前有啲好大型嘅傳染病,好似沙士咁,大陸封鎖(疫情)消息,如果我哋講嘅話,就算我哋serve完病人執番條命,都可能(被政府)秋後算帳,呢啲(疑慮)籠罩住。」

劉凱文又提到,有線《新聞刺針》數年前追蹤政府建議剔除3種原本受到法例監管的除害劑一事,政府一直拒絕向記者透露剔除該些除害劑的詳細原因,「政府話有持份者意見,食衛局堅拒講邊個係持份者。後尾(《新聞刺針》)用《公開資料守則》(及申訴專員公署介入),先逼到佢講係國家質檢總局。原來(香港政府與國家質檢總局)有咁多千絲萬縷嘅枱底交易,仲要保密。原本香港都話咗唔可以再用(該3種除害劑),做咩又要用?因為有份量嘅持份者話要用。」他坦言,香港政府處理涉及內地部門事宜時說話隱晦、「閃爍其詞」,令人憂慮。

劉凱文亦是香港專職醫療人員及護士協會幹事,他指,協會對於修例的立場傾向反對,有計劃採取後續行動,具體內容仍待確實。

醫護學界、業界陸續聯署

香港大學醫學生時政關注組織「青醫匡時」,以及「一群關心香港的醫護人員」相繼發起聯署反對修例,並呼籲市民參與6月9日舉行的反送中遊行,至昨晚11時半各有逾300人聯署。「青醫匡時」學界聯署聲明提到:「所謂『上醫醫國』,當年在港習醫的孫中山先生為公義、自由,放下從醫之路,投身革命,被尊稱國父,至今仍為我輩所敬仰。今日,喪鐘已為你我而敲,香港的核心價值危在旦夕、七百萬港人的人權隨時被斷送,眼看這種藐視立法機關甚至市民意志的行為,我等莘莘學子絕不能坐視不理。」




請加入成為眾新聞的月費訂戶,長期支持我們的工作。所有訂戶都可以收到我們的「每周時事」通訊 。

月費訂戶網址:hkcnews.com/aboutus/#subscribe